Shillong, Risaw 26: Mynta ka sngi ka seng samla pule jong ka skul bah NEHU kaba la tip kum ka NEHUSU kila pynlong ia ka jingiakhih da kaba leit ban tur sha ka ophis jong u Vice Chancellor jong katei ka skul bah halor kiba bun ki mat kiba ktah ia ki samla pule.
Kawei na ki mat kiba la ktah ia ki samla pule ka dei ka jingai ia ka kyrdan ha ki eksamin bapher bapher ba pyniaid ka skul bah NEHU ia kaba la tip kum ka “Grading” ki jaka sah ki samla pule, ki kot ha Library bad la kynnoh ba ka jingthung kam beain ia u Rohit Prasad.
Kane ka kynhun samla Pule NEHU kala pynlong ia ka jingiakhih da kaba iaid paidbah sha ophis jong u Vice Chancellor bad ha khmat ka ophis jong kila pynlong ia ka jingshong kyllain mungor bad ha kane ka sngi baroh ki jinghikai la pynsangeh namar ba ki samla pule kila ia shim bynta ha kane ka jingiakhih.
Na ka liang jong ka NEHUSU kala shim ia kane ka rai ban pynlong ia kane kajingiakhih ka long ba kaei kaba ka skul bah NEHU khamtam u VC kaei kaba u leh ka long ba ka ktah ia ki samla pule jong kane ka skul bah, na ka liang jong ka NEHUSU Kala juh ia kren na ka por sha ka por hynrei haduh mynta khlem leh ei ei.
Kat kum ka jingtip kaba kila ioh ka long ba la thung ia u Rohit Prasad kum u nongai jingmut ia u VC kane ka skul bah bad ka jingsiew ka long kaba heh bha, ka jingpyrshah jong ki ka long ba la shu thung khlem da don kano ka jingtip khot aplikoshon ha kaba ki nonghikai ruh la shai ka sngi kin sa pynlong ia ka jingiakhih.
U President ka NEHUTA u bah Lakhon Kma la kynnoh ba ka kamram jong u VC ka dei ban peit ba ka jingpule hapoh ka skul bah kan long ka thong kaba ha khmat eh, hynrei kei kaba jia pat ka long ba ia ka kam jingpule la buh sharud bad la peit pat ia kiwei kiwei ki kam kane kaei kaba jia mynta ha NEHU la kynnoh u President ka NEHUTA.
