Shillong, Jylliew 27: Ka Dorbar Shnong Wahthapbru ryngkat ka jingiatreilang bad ka Bawri Nethralaya, hynne ka sngi kala pynlong ia ka jingai jingsumar ei ia ki khmat ne ka Free Eye Camp hapoh Communitty Hall jong ka Wahthapbru ha kaba 280 ngut ki nongshong shnong kila ioh jingmyntoi.
Ka Myntri ki kam pohiing ka jylla ka Kong Roshan Warjri kaba dei ruh ka nongmihkhmat jong kane ka thain kum ka kongsan haba plie ia kane ka Free Eye Camp kala ong ba ka jingpynlong ia ka jingai jingsumar ia ki khmat ka long ka kam kaba bha kaba ka shnong Wahthapbru kala leh bad ka long ka jingkyrkhu ia ki longing longsem kiba duk.
Ha kane ka sngi ki doctor jong ka Bawri Nethralaya kila ai jingsumar ia ki paidbah kiba don ia ki jingpang khmat kiba har rukom. Ki nongpang naduh kiba rit haduh kiba la heh la san, kim shym la pynlehnohei ia kane ka kabu bad kila iapoi sha kane ka jaka dang step ban ioh jingsumar iala ki khmat ryngkat ba ka ioh ei ia ki dawai dashin.
Ha kane ka jingialang la ioh ruh ia ka jingkren na u Rangbah Shnong ka Wahthapbru u bah Raja Chullai bad u Pawan Bawri, ha kaba la iadonlang ki nongkitkam shnong, Seng Samla bad Seng Longkmie bad ia kane ka jingai jingsumar ia ki khmat la pynlong kum shi bynta jong ka jingrakhe dap 50 snem jong kane ka Shnong.(SP News)
