Shillong, Jymmang 12: Kum ka jingburom ia ki shipai ka Ri ka ophis jong ka Deputy Commissioner jong ka East Khasi Hills District kala pynlong ia ka jingiaid paidbah ki bike mynta ka miet ha kane ka nongbah Shillong.
Ia kane ka dei ka jingai ka burom ia ki shipai kiba don ha khappud kiba la ai ka jingshakri namar ka ri, ia kane la leh hapoh ka jingpyniaid jong ka kong R M Kurbah Deputy Commissioner ka EKH District.
Ia ka jingkhaweh lama la leh da u ADC u bah Shanborlang Warjri ia kaba la sdang na madan Golflink bad pynkut ha State Central Library. Ha ka jingkren jong ka DC kala ong ba la leh ia kane kum ka jingkyrshan ia ki shipai kiba dang ialeh mynta pyrshah ia ka ri Pakistan.
Ka DC kala pynkynmaw ba ka jingjia ha Pahalgam kala kdew shai ia ka jingshlur bad ka jingaiti ban len lade ki shipai bad ka jingaiti ka jong ban ia da ia ka ri, ka dei lyngba jong ki ba ioh ia ka jingshngaina bad ka jingshong suk ki paidbah ka ri.
Ka ri ka ieng tylli kawei bad ki bad ka jingburom ia ki, ka jingpeitngor ka jong ki ha ka miet ka iong ha kaba kum ki paidbah nongshong shnong ki ioh ban thiah suk jai, la ong ka DC ha ka jingkren lyngkot ka jong ka.
Ka DC kala ong ba ka sorkar ka pynshem ia ka jingkyrhan ia ki la ki don ha kano kano ka jaka kaba la buh ia ki, kala ong ba kim dei ba kim long marwei hynrei baroh don lang bad ki ha baroh ki liang, ka DC kala ong ba ka ngeit skhem ba ka ri kan sa jop ha kane ka jingialeh.
