Shillong, Nailar 17: Ka Dorbar Shnong Thynroid, East Khasi Hills District kum shibynta ban rakhe pyndonburom ia ka Sngi Laitluid jong ka Ri India, ka la pynlong da ka jingialang kaba kyrpang ha madan jong ka shnong Thynroid. Ha shwa ban pynlong ia ka jingialang la ioh shwa ia ka jing ia iaid paidbah ha kylleng u pud sawdong jong ka Dorbar Shnong Thynroid ha kaba la ia wan ban ia shim bynta shit rhem da ki spah ngut ki paidbah Nong Shong Shnong jong ka Shnong Thynroid, kynthup ruh naduh ki Longkmie long kpa, ki khun samla bad kumjuh ruh ki khynnah skul bapher bapher kiba don ha ka Shnong Thynroid.
Ka jing thmu kaba kongsan jong katei ka jing ia iaid paidbah (Public Rally) ka long kum shibynta ban wanrah ia ka jing ia tylli bad ka jing ia shim bynta lang jong ki paidbah Nong Shong shnong bad ha kajuh ka por ban pyrshah ia ki jing snew kiba la sdang ban kha roi ha kine ki sngi kiba mynta kynthup ia ki jing dih pynbuaid kyiad kiba la pyn sniewdur ia ka imlang ka sahlang bad kiba la sdang ban pynhiar dor ia ka jinglong kyrpang jong ka jaitbynriew hi baroh kawei. Ia katei ka Rally la pynlong ruh kum shi bynta ban pyn sngewthuh Paidbah ia ka jing donkam ban wanrah pat ia ka khuid ka suba ha ka shnong bad ha ka Thain hi baroh kawei.
La pynkut ia katei ka jing ia iaid paidbah ha madan shnong thynroid ha ka por shiteng sngi bad ha shwa ban ioh ia ka jingialang paidbah la pyn byrngia ia ki paidbah Nong Shong Shnong da ka jingialehkai Football na ki khun samla jong ka shnong kiba la ia wan ban shim bynta na ki kyntoit bapher bapher jong ka Shnong Thynroid ha kaba ki kynhun kiba la poi sha ka Final ki kynthup ia ka Dong Pdeng Shnong bad ka Club Nongspung ha kaba ka Dong Pdeng Shnong ka la long ka kynhun Lahduh da kaba pynliem noh k aka Club Nongspung ha ka jiang ia shut Tie Breaker.
Ha katei ka jingialang Paidbah nalor ki Nongkitkam Shnong, ki Riew rangbah bad kiwei pat ki kynrem ki lyndang la ia don ryngkat ruh da u Bah Banteidor Lyngdoh u ba dei u EMba dei peit ia ka tand Labour bad Youth Affairs, uba dei ruh ha kajuh ka por u MDC Mawkynrew Constituency.
Ki Nongkren ha katei ka sngi khamtam eh na ka liang jong u bah Distiar Nongrum uba long ruh u Sordar Shnong jong ka Shnong Thynroid, Bah Harkin Warjri Secretary Shnong Thynroit ki la ban jur bad kyntu ia ki paidbah Nong Shnong Shnong ba dei tang lyngba ka jing ia tylli bad ka jing ia treilang jong baroh yn lah ban pyn urlong ia kiba bun ki jing angnud la ka long ha kaba yn rat diengkhong ia ki jing sinew lane wat ban wanrah ia ka roi ka par ha kiba bun ki liang.
Na ka liang jong kitei ki Nongialam ba hakhmat eh jong ka Shnong Thynroid ki la pynpaw ka jing sngew nguh kaba khraw shi katdei eh ia u Bah Banteidor Lyngdoh MDC Mawkynrew Constituency u ba la kloi ban pyllait por baroh shisngi lynter ha katei ka sngi bad ki la ong ba une u MDC u long shisha uta u Nongialam uba kloi ban kit ban bah ia ka lyngkor kaba khia ha ka ban shakri ym tang ia la ka jong ka Constituency hynrei khamtam eh naka bynta ka Ri bad ka Jaitbynriew hi baroh kawei.
Haba kren kum u Kongsan ha katei ka sngi u Bah Banteidor Lyngdoh u la ong ba ki Paidbah Nong Shnong Shnong jong ka Thynroid ki long kiba donbok palat namar ki ioh ia ki Nongialam shnong kiba trei shitom, kiba tbit bad kiba iohi jngai khamtam eh ban saindur ia ka lawei kaba phyrnai jong ka Shnong hi baroh kawei, u la ong ban bat ia u Lakam Synshar ha kine ki sngi kiba mynta ka long kaba eh bad kaba jwat haduh kata kata, la ka long ha ki ing ki sem, ki Shnong ki Thaw khamtam eh ha ka kam shakri paidbah kum ki Nongmihkhmat namar ngi im ha ka juk kaba dap tang da ki jingeh bad ki jingialeh suda kat shaba ngi phai, hynrei u la ong pat ba dei tang kita kiba mad ia ki jingeh kiba poi sha ki kliar lum jong ka nam.
U Bah Banteidor Lyngdoh u la kyntu ia ki paidbah Nong shong Shnong jong ka Shnong Thynroid ba kidei barabor ban don ia ka mynsiem jong ka jing iai shah, ka mynsiem jong ka jing ia trei lang, ka mynsiem ban ia ai jingmut ban iatei iwei ia iwei bad ka mynsiem ka bym ia pihuin, u la ong ba dei tang lyngba jong kitei ki Saw tylli ki Paia Khnong kiba lah kyrshan bad kiba lah ban tei ia ka rympei kaba skhem. Shuh shuh naka liang jong U Bah Banteidor Lyngdoh u la ong baka kamram kaba hakhmat jong u kum u Nongmihkhmat paidbah ha I bor iba rit kum u MDC ka long ban trei hok bad ban pyndep iala ka jong ka kamram kumba ki paidbah jong ka Mawkynrew Constituency ki la bynshet ia ka lyngkor ha ki tyrpeng.
Ia ka jingiang ha katei ka sngi la pyniaid da u Bah Harkin Warjri Secretary Shnong Thynroit, la pynphuh pynphieng shuh shuh ia ka jingialang da ka jing iadon ryngkat ruh da ki riew pawkhmat jong ka Thain kiba kynthup ia u Bah Distiar Nongrum uba long ruh u Sordar Shnong jong ka Shnong Thynroid, BahShonroy Rynjah, Secretary Shnong Laitkyrhong, u Bah Dengbok Kurkalang, Bah Eustenroy Nongrum President VDP Thynroid, Bah Victor Nongrum Secretary VDP Thynroid lem bad kiwei kiwei de ki riew rangbah.
