Shillong, Nohprah 12: Ka Synjuk ki Seng Samla Shnong (SSSS), ha ryngkat ka jingiatreilang bad ka Seng Samla Raid Nongblai mynta u sngi ka la pynlong ia ka prokram ai jinghikai ka ban kyntiew ia ki samla ha ki kam nongialam bad kumjuh ruh ban kyntiew ia ka imlang sahlang. Ia kane ka prokram la pynlong ha Ing Dorbar Shnong ka Raid Nongblai ha ka shnong Wahlyngkhat buad yn pynkut pat ha ka 16 tarik u Nohprah . Ia kane ka prokram ai jinghikai la pynlong da ka jingbei tyngka jong ka Nehu Yuva Kendra, Shillong ha kaba ka thong hi ka long ban ai ia ki samla ka jingshemphang , ka jingsngew shlur, ka jingshakri bad kumjuh ka jingkiew shaphrang ha bun ki liang bad ki jinghikai kiba dei ban ai sha ki samla.
Ha ka sngi plie ia kane ka prokram ai jinghikai la ia don lang da u bah Vanshan Buhphang u ba dei u Chairman ka SSSS bad ki dkhot jong ka, u Bah Seibor Jaktung u ba dei u Secretary ka Seng Samla Raid Nongblai, U Sordar ka Raid Nongblai u Bah Nokot Khriam, u Bah Bantei Nongrum u ba dei u Village Level Entrepreneur bad u ba dei ruh ha kajuh ka por u Publicity Secretary ka SS Raid Nongblai, ki Rangbah Shnong jong ki lai tylli ki shnong kiba hap ha ka Raid Nongblai kata ka Shutim, Wahlyngkhat bad Nongblai bad kiwei kiwei.
Ha kane ka sngi sdang jong ka prokram ai jinghikai kiba la wan ban ai jinghikai ki kynthup ia u Bah J Lyngdoh u heh ka IT ba dei peit ia ki CSC ha Meghalaya, u Bah Kyrmen Uriah u ba dei u President ka MEMA bad Chief Editor ka Batesi TV bad Peitngor, u bah AK Nongkynrih u ba dei u nonghikai ka skul bah NEHU bad kiwei kiwei. Na ka liang u Bah J Lyngdoh haba ai jinghikai ha kane ka sngi ia ki samla u la kyntu ia ki samla ban pyndonkam ia ka Internet Banking khnang ba kan wanrah jingmyntoi ha ka jingkynshew pisa bad kan pynsuk ruh ha ka ia die ia thied.
U Bah Kyrmnen Uriah u la kyntu ia ki samla ban shim ia ka jingbiang por ryngkat ka akor ka burom khnang ba kan lah ban saindur ia ki samla ban poi sha ka lynti ban long ki nongialam bad kum ki rishot ba skhem ka jaidbynriew. U la ong ba ki samla ki donkam ia ka nongrim ba skhem khnang ba kin long ka nuksa ban long ki nongialam lynti ha ka lashai la shi sngi.
Dr AK Nongkynrih u la pynpaw na shi bynta ka jingai hikai jong u ba ka ba donkam eh ha kine ki sngi ki ba mynta ka long ban saindur bha ia la ka rympei ing. U la ong ba ka ei kaei ka sdang na la ing bad ki longing ki pynlong ia ka imlang sahlang bad haba phai sha ka jinglong ialam hi dei ban don ka jinglong aiti lut bad ka mynta ka thaw ia la lawei.
Kiwei kiwei ki bynta jingai jinghikai ba la mang ki long ki mat ba ia dei bad ka imlang sahlang , ban iada ia ka mariang , ban thaw ia ki kynhun ban trei na ka bynta ka bha ka miat jong ka imlang sahlang , ka khein ka diang ne ka jingbuh jingkhein ia ki kam ki jam, ban pyniaid ia ki kynhun bad kiwei kiwei kiba long ki jingprat lynti ia ki samla ban shim ia ka bynta kum ki nongialam ha ka lashai la shi sngi.
