Shillong, Risaw 10: Ka seng Meghalaya SSA Schools’ Association (MSSASA) kala pynpaw ia ka jingsngewnguh kaba khraw ia kane ka sorkar MDA kaba la shim ia ka rai ban pynneh ia ka tulop jong ki nonghikai “Sarva Shiksha Abhiyan” na ka bynta ki skul UP bad LP kiba don haduh 5139 ngut kiba hikai ha ka jylla baroh kawei.
Kum ka seng ka pynpaw ruh ia ka jingsngewnguh ruh ia ka tnad pule puthi jong ka sorkar jylla ia baroh ki ophisar kiba la trei shitom na ka bynta ka jingbit jingbiang jong ki nonghikai wat hapdeng ki jingeh kiba bun kila pyndep iala ka kamram jong ki kum ki nongtrei sorkar.
Kaei kaba ka sorkar kala leh na ka bynta ki nonghikai ban pynneh ia ka tulop jong ki nonghikai kumba ka seng kala dawa na ka sorkar ba ki nonghikai SSA ha ki LP ka neh T.19044/- tyngka bad na ka bynta ki UP ka neh T.20493/- tyngka. Ka seng ka iohi ia ka jingshim khia kane ka sorkar na ka bynta ki nonghikai da kaba buh ia ka song tyngka ban siew ia ka tulop jong ki nonghikai.
Ki nonghikai SSA ki pynpaw shisha ia ka jingsngewnguh ia u myntri rangbah ka jylla u Conrad K Sangma bad kyrpang ruh ia u ophisar u bah DP Wahlang bad baroh ki ophisar kiba la ia trei shitom na ka bynta ka jingbit jingbiang jong ki nonghikai SSA ha ka jylla Meghalaya.
