Shillong, Niaitung 23: Halor ka ejahar kaba la ai da ka Deputy Commissioner ka East Khasi Hills pyrshah ia ki 35 ngut kiba la kynnoh ba ki la leit sha ka jingiathoh shong kurim ha Greenwood Resort Assam, na ka liang jong ki pulit kila register ia ka mukotduma pyrshah ia ki ha ki lai tylli ki kyndon ain.
Haba kren ha ki lat pathai khubor u Bah Sylvester Nongtynger, Superintendent ki pulit jong ka East Khasi Hills District u la iathuh ba ha dien ba la ioh ia ka ejahar na ka Deputy Commissioner, ki la register ia ka ejahar bad ka Sardar Police Station Case number 159(7) 2020.
Halor ka ejahar kaba la ioh na ka Deputy Commissioner jong ka East Khasi Hills District, ka tnad pulit kala pynngat ia kitei ki 35 ngut ha ki lai tylli ki kyndon jong ka ain, kaba nyngkong la pynngat hapoh ka kyndon 188/34 jong ka Indian Penal Code, kaba ar katkum ka Meghalaya pandemic Disaster COVID-19 Regulation 2020 bad kaba lai ka dei ka long katkum ka 5th Amendment 51(B) 52 disaster management act 2005.
Ka jingpynngat kaba nyngkong hapoh ka kyndon 188 IPC, ka long ba kila leh bymkonguh ia ki kyndon bala pynjari da ki briew jong ka sorkar kiba la shah pynkup bor. Ka jingpynngat hapoh ka kyndon 34 IPC ka long ba kila leh bymkonguh kum ka kynhun na ka bynta ka juh ka jingthmu.
Kwei pat ka kyndon kaba la pynngat ka long hapoh jong ka Meghalaya pandemic Disaster COVID-19 Regulation 2020, katkum kane ka long ba lada la lah ban pynshisha ba kila pynkhien ia ki jingpynbna jong ka sorkar ki lah ban shah set phatok ryngkat ka kuna.
Kwei pat ka kyndon ka long hapoh jong ka 5th Amendment 51(B) 52 disaster management act 2005, katkum kane ka kyndon ka long ba ka jingpynshitom ka long ba kila pynthut bad ba kim treh ban kohnguh ia ki jingpynbna jong ka sorkar pdeng bad kum juh ka sorkar jylla. Lada lap ba ki la pynkhein ia ki kyndon ka jingpynshitom ka long ba lah ban set phatok haduh ar snem.
