Shillong, Iaiong 09: Ka KSU Shillong Mihngi Circle ka pynrem jur ia ki pulit ka Police Pasteur Beat House da kaba kem ia san ngut ki dkhot ka KSU Lumshyiap ha ka miet jong ka 3 tarik mynta u bnai.
Ha u kyrwoh ba la phah da u Banjop War, General Secretary ka Seng, u la ong, “n gi kwah ban pynshai paidbah ba ha katei ka miet katto katne ki dkhot ka KSU Lumshyiap Unit ki la leit ban khynra ia ki bar jylla ba sah be-ain hangto khlem ki kot ki sla kiba biang bad ruh khlem ka jingbit naka shnong bad namarba kane ka jingleit khynra kam dei shuh ka sien banyngkong bad ha kajuh ka por ruh ba ka seng KSU Lumshyiap Unit kam kwah ban iaid lait na ki bor ka ain.”
“Hadien ba la lap ba kim don ki kot ki sla kiba biang, ki la leit ban aiti ia kine ki bar jylla sha Police Pasteur Beat House kumba ju dei ka rukom khnang ba ki bor bahalor kane ka Beat House kin leh ia kaba donkam pynban ynda poi hangtei ki la shah pynngat kylla ha ki kyndon bapher bapher bad shah kem kylla ha katei hi ka miet,” ong u kyrwoh.
Ka KSU Shillong Mihngi Circle ka pynrem jur ia katei ka jingleh shiliang jong utei u OC ba dei peit ia ka Pasteur Beat House. Kane ka jingleh ka jong u ka paw shai ba dei ki bor ka ain kiba pynshlur ia ka jingrung kyrthep ki bar jylla bad ki mynder hapoh ka Bri Hynniewtrep. Ka seng ka maham jur ruh ia baroh ki kontraktor kiba wan ialam da ki bar jylla ki bym biang ia ki kot ki sla ban wan trei hapoh ka thain jong ka Shillong Mihngi, pynkut u kyrwoh.(SP News)
