Shillong, Naitung 22: Ka ‘Meghalaya State Commission for Women’ (MSCW) ka pynpaw ia ka jingsngew kyndit bad pynrem jur ia kaei kaba la jia hapoh ka jylla Manipur ha kaba ar ngut ki kynthei kila shah pyniaid lyngkhuid ha ki riew sniew ha surok bad ha dien kata la leh beijot ia ki ha pyntbha kba.
Ia kane ka jingjia la paw pyrthei haba katei ka Video kala saphriang ha ki Social Media ha ka 19/7/2022 bad kala pynsuh jer ha baroh kawei ka ri halor katei ka jingjia bad hadien 24 kynta bala sa phriang ka Video la ioh ban kem saw ngut kiba la shah kynnoh ba ki don kti ha katei ka kam leh beijot.
Ka MSCW ka ai ka jingkhublei kaba kyrpang ia ka National Human Right Commission (NHRC) bad ia ka iing bishar kaba ha khlieh duh jong ka Ri India kaba la shim khia ia kane ka kam bad u nongbishar ba rangbah duh u la ong ba, ka jingpyndon kam ki kynthei na ka bynta kala pynthud shisha.
Ka iing bishar kala bthah ia ka sorkar pdeng bad ia ka sorkar jylla ban kem ia kito kiba don kti ha ka tei ka jingleh ia ka kam poh jaitpoh rati, kaba la pynjah burom ia ka long rynieng jong ki kynthei, ki khynnah jong kane ka ri baroh kawei. Kano kano ka jingleh pyrshah ia ka long rynieng jong ki kynthei kaba ym lah ban pdiang kaba la pynkhein ia ka hok long briew man briew khatam ia ki rit paid.
Ban pynthikna ba kum kine ki jingjia kin nym jia shuh ha dien ha bud, khmih lyngti ba ka jingsuk kan wan phai sha ka jylla Manipur, ka MSCW ka kyntu ia ki bor ba dei peit ban ai ka jingiarap ia baroh kito kiba la shah ktah ha kane ka jingiaumsnam kaba la neh la jan lai bnia ha katei ka jylla. Ka kommission ka phah ia ka khubor sngew lem sha kiba ha iing ha sem kong kiba mat ia ka jingeh.
