Shillong, Jylliew 12: Ka Dorbar Ki Khlieh Nongsynshar Ka Ri Hynniewtrep, ka pynrem jur ia ka rai jong ka Executive Committee, KHADC, hapoh ka jingialam jong bad u Bah Ardent M Basaiawmoit, MLA & MDC, Chief Executive Member,(CEM), bad u Bah KP Pangniang, MLA & MDC, Executive Member, i/c Elaka, kiba na ka seng HSPDP, kiba la pynmih ia ka hukum ha ka 19 tarik May 2014 ban pynduh ban pyniap ia ka Riti ka Dustur kaba la neh la don palat 100 snem hapoh ka Hima Malaisohmat, ha kaba katei ka hukum ka rai bad bthah ban pynlong ia ka jingjied Syiem da u paidbah.
Ka long kaei kaei kaba kta jur kaba shyrkhei haba ka District Council kaba la buh ban pynneh pynsah, ban tei bad ban pynjanai ia ki Riti ki Dustur ka wan pynban ban thombor ia ka hok jong ki Hima. Kane ka jingjia kaba shyrkhei ka pynkynmaw ia ka jingong ki riewtymmen kiba juh pynkynmaw ba ka long kaba ma ban ai bat wait ha u khynnah khyllung ioh ba u pom bakala ialade.
Kumba ia tip paidbah, kane baroh ka long ka jingshim kabu jong ka sain pyrthei (politic) ba la lam khmat da ka seng HSPDP, kaba la pyrta ha ka por election ba ka dei ka party kaban iada ia ka jaidbynriew ia ka Riti ka Dustur. Ym lah ban ong hato ka Seng HSPDP ka mynjur ne em ia kum kane ka rai pynduh, ka rai pyniap ia ki Riti Dustur jong ka Hima Malaisohmat da ka Executive Committee KHADC. ARPA (kaba kynthup ia ka UDP, HSPDP bad KHNAM).
Kumba ka long kane ka Executive Committee KHADC kaba synshar ha ka kyrteng ARPA ka dei ka EC khleh khawlang hapdeng ka HSPDP, UDP bad KHNAM. Ka Dorbar ki Khlieh Nongsynshar ka sngewdei ban pan jingshai na ka seng UDP, HSPDP bad KHNAM la ki mynjur ne em ia katei ka jingpynduh pyndam ka jingpyniap ia ka Riti Dustur kaba la don la palat 100 shispah snem hapoh ka Hima Malaisohmat. Ngi sngewdei ba kiwei kiwei ki seng sain pyrthei kiba don hapoh ka KHADC kum ka Congress bad ka NCP ba kin pynshai ia la ka nongrim halor katei ka phang.
Katkum ka order KHADC ha katei ka hukum kaba 19 May 2014, ki bor KHADC ki pynksan ia lade na ka kaiphod kaba 1903 ba la thoh da u Capt D Herbert u Deputy Commissioner, ka United Khasi and Jaintia Hills, ha kaba la thoh ha katei ka kot ba la don teng ka jingjied Syiem da u paidbah ha u snem 1893 hynrei la jop hi da u Syiem jaid Malai, hynrei ka jingthom bor ki bor KHADC ka paw haba ha ka juh ka report halor ka Malaisohmat State haba pynkut utei u Capt Herbert u la ong kumne ‘under no circumstances should an election by the people be held’ wat lada don kano kano ka daw, ym dei ban pynlong election kaban jied da u paidbah’
Ka jingkylli ka long balei u CEM, KHADC, bad u Executive Member i/c Elaka ki leh matlah ia katei ka bynta jong katei ka report.
Kumta, ka Dorbar Ki Khlieh Nongsynshar ka Ri Hynniewtrep ka kyntu jur ia ki khun ki hajar jong ka Hima Malaisohmat ban kyntait ia katei ka hukum bein Dorbar na ka KHADC kaba thmu ban pynpra ban pynpait ia ka it ka Hima lyngba ki buit politic jong ki riewshimet khamtam na ka party HSPDP.
Ka Dorbar ka kyntu jur ia ki MDC jong ka KHADC khlem da sngewliang liang lada ki dei kiba ieng shisha ha ka nongrim ban iada ia ka Riti ka Dustur ban ieng rangbah ban pyrshah jur ia katei ka jingthom bor bad ka jingleh donbor kiba shyrkhei da ka Executive Committee, ARPA (UDP, HSPDP, KHNAM) ba la ialam da u Bah Ardent M Basaiawmoit, CEM, KHADC.
Ngi pynkynmaw ia u Khun u Hajar ba dei halor kum kine ki jingleh bein Dorbar kiba sngewsih na ki bor KHADC kiba na ka por sha ka por ki bor KHADC ki la kylla long tang ki nongpynkiew iing lieh iing saw ia ki Hima/Elaka, bad kine ki jingjia ki la pynlong ia ka Dorbar ki Khlieh Nongsynshar Ka Ri Hynniewtrep mynta bun snem ban dawa na ka Sorkar Jylla bad na ka Sorkar India ban ai da ka Council kaba kyrpang kaba khlem liang (partyless) na ka bynta Ka Dorbar Ki Khlieh Nongsynshar Ka Ri Hynniewtrep. Namar kumba ka long ki Hima /Elaka kim ioh ia ka jingsynshar kaba khuid haba la synshar ki seng sain pyrthei kiba thmu tang kumno ban khwan bor ialade.(SP News)
