Shillong, Jymmang 01: Mynta ka sngi ka Meghalaya Joint Council of Trade Union bad Association, Shillong, mynta ka sngi kila pynlong ia ka jingrakhe ia ka “May Day” ha jaka pyning kali jan Additional Secretariat ban rakhe ia kane ka sngi jong ki nongbylla ryngkat bad ka pyrthei baroh kawei.
Ha ka jingkren jong u Manauj Chakraborty President ka MJCTU, la pynshai halor ki phra tylli ki mat kiba ki Trade Union ha Ri India ki dawa ba ka sorkar ka dei ban pyntrei kam, kiba don haduh phra tylli kiba ktah ia ki nongtrei sorkar bad ki nongbylla.
Ki jingdawa ka long ba ka sorkar ka dei ban sngeh ka jingktah ia ka Science bad ka jingiaid sha khmat ha kaba ia bud ia ka jingkiew ka science kaba katkum kane ka juk kaba mynta, dei ban weng noh ia ki ain kiba ktah ia ki nongbylla bad ban pyntrei kam ia ki ain kiba ia dei bad ki nongbylla.
Ka sorkar pdeng bad ki sorkar jylla ki dei ban sngeh ka jingaiti ia ki kompeni jong ka sorkar sha ki riew shimet, ka sorkar ka dei ban shim ia ki lat ki lynti kumno ban iada na ka jingkiew dor ki marbam, ka sorkar ka dei ban pyntreikam biang ia ka bai bam tynmen ia kaba la weng ha u snem 2010.
Ka sorkar ka dei ban pynbna shuti paidbah ha ka sngi “ Ki nongbylla” Ka sorkar ka dei ban pynkiew ia ka dor bai bylla jong kiba trei bad ka sorkar pdeng bad ki sorkar jylla, kaba duna eh ka bai bylla ba ka sorkar ka siew dei ka jylla Meghalaya bad ka sorkar ka dei ban ai jingshngain ia ki nongbylla ha baroh kawei ka jylla Meghalaya.
U Bah Edward Lynshing la ong ba ha Meghalaya ki briew kim pat sngewthuh ia kane ka sngi ki nongbylla, la ong ba nangne sha khmat kin ialeh ban pynshai paidbah ba la buh khnang ia kane ka sngi burom jong ki nongbylla ban burom ia ka jingtrei jong ki, ha India la sdang ban rakhe ha u snem 1921 mynta kala kot sha ka 103 snem bad ha ka pyrthei baroh kaweikala kot sha ka 138 snem.
Ha kane ka sngi ia kajingialang la pyniaid da u JL Das General Secretary bad ki nongialam na ki tnad treikam jong ka sorkar pdeng kum na ki Bank, BSNL bad kiwei kiwei ki nongtrei kiba dei na ki kompeni jong ka sorkar pdeng bad sorkar jylla, ia ka jingkren ai khublei la ai da u bah Lari Warjri.
