Shillong, Naitung 28: U myntri Sorkar jylla u bah Paul Lyngdoh uba long dei ruh u nongaiktien kane ka sorkar MDA-2 ula ong ka jinghuri hura ha Tura ba la jia ha ka lah Sngi u Blei la lah ban tehlakam.
U Bah Paul Lyngdoh haba iakren bad ki nongthoh khubor mynta ka sngi ula ong, ba u kubur ba katei ka jingjia la lah ban tehlakam da ka tnat Kam Pohiing bad ka shongsuk shong shngaiñ ka la wan biang ha katei ka jaka.
Katba ki pulit dang pynlong ka jingtohkit ban lap ki daw tynrai kiba pynlong ia katei ka jingjia bad kin sa lap ia ki jingshisha hadien ka jingtohkit ha kaba ia dei bad ka jingjia kaba la jia ha Tura.
Ha ka juh ka por u la pynrem ruh ia ka Legal Rights Observatory- LRO kaba la kynnoh ba ka seng Khasi Students Union (KSU) ka la don bynta ban thombor ha Mahadev Khola ha ka Lah Sngi U Blei.
Na ka liang ka sorkar jylla, u la ong ba ka pynrem ia ka LRO ka ba pyrshang ban pynkhih win bad pynkulmar ia ki paitbah halor ki jingkynthoh khlem nongrim la ong ba ka LRO ka la pyndonkam bakla ia ka social media ban pynkhihwin ia ki paitbah ha kiwei ki jylla pyrshah ia ki seng niam bad ia ki jaidbynriew trai ri.
U bah Paul Lyngdoh u la ong ba,Ka tnat pulit ka la tip ia kane bad ka la shimkhia ban wad bniah ban lap ia kine ki briew bad ki dei kiei ruh, ha kaba ki pulit kila ioh ban kem ia kito kiba la paw kiba shah kynnoh don kti.
