Shillong, Naitung 13: Ka Sorkar Jylla mynta ka sngi Palei, ka la pynsangeh noh ia ka jingtreikam ki artylli ki hukum ba pynmih da ka Deputy Commissioner ka East Khasi Hills ka Kong RM Kurbah, ki ba iadei bad ka hukum khang dukan hapoh 10 baje mynmiet ha Nongbah Shillong bad ka jingpyntreikam ia ka Odd/Even Number ia ki kali kamai.
Ka Sorkar ka la shim ia kane ka rai ha ka jingialang ki Heh Sorkar ba la pyniaid da u Symbud Myntri Rangbah ka Jylla ba peit ia ka Tnad kam pohiing u Bah Prestone Tynsong, kaba la wan iashimbynta da ki Heh Pulit, ki Heh Ophisar bad ka Deputy Commissioner ka East Khasi Hills.
Mynta ka sngi ki pulit kila pyntrei kam ia ka hukum jong ka Deputy Commissioner ka East Khasi Hills District ba ka jingiaid ki kali kamai na Kashari sha Motphran kan long beit katkum ki number Odd bad Even.
Ki pulti kila ap ha Kashari bad ia ki kali ki bymdei iaid mynta kila pynphai noh na Kashari sha lynti ban leit sha Nan Polok, halor kane ka jingleh ki pulit ki nongniah kali Taxi kila pynieng ia ki kali ha khmat Civil Hosptial bad kane kala wanrah ia ka jingdheng kali ha kaba wat ki kali Ambulance kila shitom ban iaid.
Ki Taxi kiba la pynieng ha khmat Civil Hospital ki don da ki spah tylli, kane kal wanrah ia ka jingdheng kali kaba la palat ban kiew sha kthian Laitumkhrah kiba iaid na ka surok bah Shillong Jowai kaba sdang na surok Civil Hospital Shillong.
Haba iakren bad ki nongthoh khubor hadien ka jingialang, u Bah Prestone ula pyntip ba ka jingpynjari ia ka kyndon 144 CrPC ha Nongbah Shillong kaba hukum ia ki dukan bam bad kiwei kiwei ki dukan die mar ba kin khang noh hapoh ka 10 baje mynmiet, kan ym treikam shuh.
Hynrei ula pyntip pat ba ka jingialang ka la rai ba ka jingpynjari ia ka 144 CrPC kan treikam noh tang ha ki lai tylli ki jaka kiba don ha Nongbah Shillong kata ha ka thain Assembly Hotel, City Hut Dhaba, Wards Lake, Polo shaduh Urkaliar.
U bah Prestone Tynsong u la pyntip ba katkum ka jingpynjari ba thymmai, la buh por ba ki dukan ki lah ban plie tad haduh ka por 11:30 baje mynmiet
Lah ban kdew, ka Deputy Commissioner ka East Khasi Hills, dang shen kala pynmih ia ka hukum ba pynjari ia ka kyndon 144 CrPC ba bthah ia baroh ki dukan/dukam bam bad kiwei ki dukan die ba kin khang noh hapoh ka 10 baje. Kala pynksan ruh ia kane da kaba ong ba ka Nongbah Shillong kam long shuh kaba shngain ha ka por mynmiet namar ki kam iashoh iadat ha kylleng ki jaka ka Nongbah.
U Bah Prestone u pyntip ba ka jingialang ka la rai ban pynkhlain ia ka jingdon jong ki pulit ki ban pahara ha kylleng ki jaka ka nongbah Shillong haba ong ba ka jingpahara kan long 24 kynta na ka bynta ban ai jingshngain ia ki paidbah.
Nalor kane, u la ong ha ka jingialang High Level ka la shim ruh ia ka rai ban pynsangeh noh ia ka hukum jong ka Deputy Commissioner ba pyntreikam ia ka Odd-Even Number na ka bynta ki kali kamai kiba rung sha ki thain Kashari-Police Bazaar-Motphran.
Kane ka rai jong ka Sorkar ka la mih ruh hadien ba ki nongniah taxi kamai kila iakhih paidbah hynne ka sngi ha Barik, hakhmat ka Civil Hospital Shillong, da kaba sangeh kamai, kaba lam sha ka jingdheng kali kaba jur ha Sor.
Ki Pulit Traffic ka East Khasi Hills kila leit ban tuklar ia kane ka jingkah lynti jong ki taxi kamai ha Barik hynrei ki nongniah kali kila pyneh triang haba dawa ba ka Deputy Commissioner ka dei ban weng noh ia ka hukum mardor.
