Shillong, Kyllalyngkot 15: U Myntri Rangbah ka jylla u Conrad K Sangma ha ka sngi thohdieng u la pynlong ia ka jingialang bad ka President ka Indian Olympic Association ka P. T Usha lyngba ka video conference ha ka jingiadonlang ki ophisar ka Meghalaya Olympic Association (MOA)
Ha kane ka jingiakynduh u myntri rangbah ka jylla u la pynshai ha u president ka IOA ia ka jinglong ba la khreh bad pynkhreh jong ka jylla ban pdiang ia ka National Games kaba 39 ha u snem 2027.
U Conrad K Sangma u la pyntip ba ha kine ki saw snem ba la dep, ka jylla ka la bei pisa ban thaw ia ki lad jingialehkai, kynthup ia ka jingpynheh ia ka JN Sports Complex ha Shillong, ka madan ialehkai Wahijher ha Jaintia Hills bad ka P.A. Sangma Integrated Sports Complex ha Tura bad kiwei kiwei ki jaka ïalehkai bapher bapher.
U la pyntip ruh ba ka nongbah Shillong ka la lah ban pynlong ïa kiba bun ki jingïalehkai kiba kynthup ïa ka North East Games ha u snem 2022, ka South Asian Games ha u snem 2016 bad ha kine ki lai snem ba la dep la ju pynlong man ka por ïa ka Meghalaya Games.
U Commissioner Sports & Youth Affairs u Dr. D. Vijay Kumar u la pyntip ba ka jylla ka la iasoi ia ka jingiateh bad ka IOA ha u snem 2018, ha kaba ka nongbah Shillong kan long ka nongbah ban pdiang, bad ar tylli kiwei pat ki nongbah i.e Tura bad Jowai kin pdiang ia ki jait jingialehkai bapher bapher na ka bynta ka ki jingialehkai jong ka Ri.
U President ka IOA u la ong ba ka synjuk ka dang pyrkhat ban ai lad ia ka jylla Meghalaya ban pynlong ia ki jingialehkai. Mynta u snem ia ki jingialehkai la pynlong ha Uttarakhand, bad ha u snem 2026 yn nym pynlong shuh ia ka jingialehkai national namar ba ka India kan pynlong ia ka Asian Games ha u snem ban wan.
