Shillong, Rymphang 20: Hadien palat 30 tylli ki snem ka jingbym iahun ïasuk halor u pud u sam, ka shnong Umphyrnai bad Lamlyer Nongkrem ha ka 19 tarik u Rymphang, 2022 ki la lah ban ia pynbeit syndon ia kane ka kam da kaba ia sieh mawpud ha ki jaka ba la ia hun lang.
La sakhi bad pynskhem ia ka jingsieh mawpud da u Syiem Khynnah ka Hima Khyrim, Pa’iem Habapan Sing Syiem, u Lyngdoh ka Raid Nongkrem, Bah Pynïaidsuk Lyngdoh, Bah Bhalang Lyngdoh, Chairman ka Nongkrem Dorbar Pyllun, Tymmen Basan F Pyngrope.
Ki ar shnong ha ka jingialam u Bah Lovingstone Kharkongor, Sordar ka Shnong Umphyrnai lem bad u Bah Pyndaplang Kharsahnoh, Sordar ka Shnong Lamlyer ki la lam khmat ia kane ka jingsieh maw pud ha ka jingïadonlang ki nongkitkam shnong na kine ki shnong.
Hadien kane ka jingsieh mawpud, la don ka jingialang aiti ia ka Soskular ba la pynskhem ia u pud u sam da ka ophis u Syiem ka Hima Khyrim ia kaba la pule shwa sa u Pa’iem Khynnah uba la ai ka jingkitbok jingkitrwiang ia kine ki shnong ba kin ia im suk suk im sain khlem don shuh ka jingiathut nangne sha khmat.
U Lyngdoh ka Raid Nongkrem, Bah Pynïaidsuk Lyngdoh u la ong ba kane ka sienjam kine ki ar shnong kan dei ka nuksa ia kiwei pat ban ia pynbeit ia u pud u sam da ka jingiasngewthuh bad da ka jingiakren.
Ia kane ka jingïalang la pyniaid da u Tymmen Basan F Pyngrope, uba la don ia ka bynta kum u riewpdeng ban wanrah ia kine ki shnong sha ka jingiasngewthuh jingmut.
