Shillong, Naitung 16: Ki nonghikai hapoh ka lama jong ka “Meghalaya 4th Teachers Association” kila ia kynduh ia u myntri rangbah ka jylla u Conrad K Sangma ban pynssngew ia ki jingeh kaba ki ia kynduh kum ki nonghikai, ha kane ka jingiakynduh kila ai da ka jingthoh.
Ha kane ka jingiakynduh na ka liang jong u myntri rangbah ka jylla la ong ba ka sorkar kan sa shong bad bishar bniah ia ka jingpynsngew ka jong ki, namar kum ka sorkar ka don ka jingthmu ban weng ia ki jingeh jong ki nonghikai na ka bynta ka bit ka biang ka jong ki nonghikai.
Ka sorkar ka thung ia kine ki nonghikai kiba la tip kum ki ‘Fourth Teacher’ ha ki Upper Primary School kiba bun ki khynnah skul, ka jingdon jong kine ki nonghikai ha ki skul ki don hapoh ka 1000 ngut ha ka jylla baroh kawei.
Ia kine ki nonghikai la thung da ka sorkar jylla bad ka jingsiew ia ki ruh ka dei na ka mang tyngka jong ka sorkar jylla bad ka jngsiew tulop ia kine ki nonghikai ka long shisien lai bnai, kine ki nonghikai ki don la ka jingeh bad ki kwah ba ka sorkar jylla kan sngap lem ia ka jingeh jong ki.
