Shillong, Jymmang 12: Mynta ka sngi u myntri ka tnad pule puthi ka jylla u Rakkam A Sangma u la thoh da ka shithi ban pyntip sha ka National Testing Agency (NTA) ba ki don 200 tylli ki kor Komputer ha ka jylla kiba lah ban pyndon kam ban thoh ia ka CUET eksam.
Ha ka shithi kaba la phah sha ka NTA u myntri ka tand pule puthi u la phah lang ia ki jaka kaba ki kor Komputer ki don ba lah ban pyndon kam ia ki kum ki jaka ban thoh ia ka CUET eksam ha ka jylla.
Ia ki jaka la pyntip ruh sah ka Tata Consultancy Services (TCS) namar dei kane kaba shim ia ka jingkit khlieh ban pynbiang ia ki jaka ban thoh CUET eksam, na ka liang jong ka sorkar jylla ka kloi ban ia treilang ban wat ia ki jaka kiba don ia ki kor Komputer.
Ha ka shithi la thoh ba la sngewthuh kan siew por katto katne sngi ban pynshisha ia ka jingdon ki jaka da ka TCS, haba ia dei bad kane u myntri ka tnad pule puthi la ong ba dei ban pynkynriah ia ka tarik thoh eksam na ka bynta ka jylla Meghalaya haduh ba ka TCS kan long ban pynbiang.
Kane ka long ban pynthikna ba baroh ki samla pule kane ka jylla ki dei ban ioh ban thoh ia ka CUET eksam ha ka jylla, kane kan weng ia ki jingeh kaba ki samla pule kane ka jylla kim hap ban leit sha bar ka jylla ban thoh ia ka eksam.
Na ka liang jong u myntri ka tnad pule puthi la ai khublei kyrpang ia ka NTA kaba la sngap ia ka jingthoh kaba la phah da u myntri rangbah ka jylla ha ka 10/05/2025 ha kaba kala jubab, kumta ka sorkar Meghalaya ka khmih lynti ba ka NTA kan sngap na ka bynta ka jingbit jingbiang ki samla pule ka jylla.
