Jowai, Nailur 08: Ha ka ka jingiadei bad ka jingdawa ka Karbi Pnar Peace Committee(KPP) na u Myntri rangbah ka jylla Assam ban buh ia ka Police Out Post ha Khanduli ban tehlakam ia ki kam sniew, bad ka jingdaw ban pynioh ia ki iing dorbar, ban shimti iaka skul Chesong English High School ban myntoi ki 38 tylli ki shnong ha katei ka thain kaba bun na ki iing ki dei kiba wan na ki longiing ba duk bad kiwei kiwe de ki jingdawa na ka sorkar Assam.
Na ka liang ka seng Khasi Jaintia National Union (KJNU), ka pyrshah jur ia kane ka jingdawa bad kam sngew iahap hi ruh tangkhyndiat ia katei ka jingdawa bad jingpan ka KPPC na ka sorkar Assam ban buh ia kiei kiei ki jingdon kam ki paidbah na ka tnat sorkar Assam hapoh ka jylla Meghalaya jong , kaba ym lah ban long da lei lei ruh. Namar ba ia ka Khanduli ka dei ka shnong kaba hap hapoh ka jylla Meghalaya.
U nongialam ka seng KJNU u samla Niman.N. Shadap u la ong ba ka seng ka ieng ha ka nongrim ban ker ban da ia u pud u sam jong ka jylla bad ban peit ia ka iap ka im jong ka jait bynriew, ym dei tang hapoh ka Bri u hynnietrep hynrei wat sha bar ruh ka seng ka juh leit jngoh bad ia kynduh ia ki paradoh parasnam, kumno kin leh ba kinioh ia ka hok jong ngi lada ha kino kino ki liang, kumba ka seng ka dawa ia ka Khasi Jaintia Land khnang ba kan wan ki jingmyntoi ia ka pateng kaba dangwan.
Ka seng ka ong ruh ba lada ka sorkar Assam ka pyrshang ban buh ia kitei ki jingdawa ka Karbi Pnar Peace Committee hapoh u pud u sam jong ka Meghalaya ka seng kan nym ailad da lei lei ruh ia ka Sorkar Assam ban wanrah ia kino kino ki kam pynroi ne ki jingmyntoi hapoh u pud u sam jong ka jylla Meghalaya, lada kane ka Committee ka kwah ia ka Out Post ne ia kiei kiei ki jingdonkam jong ki paidbah ka dei ban dawa na ka jylla Meghalaya hi.
Ki nongshong shnong jong ka jylla Meghalaya kiba don ha khappud ki dei ban sngewthuh shai ia kaei kaba ki pan ki dei ban pyrkhat shispah sien ioh ba kane ka jingdawa jong ki kan long pynban ka jingtip ia ka jaitbynriew jong ngi ba haduh mynta wat u pud u sam ruh kam long kaba thikna na kata ka daw ngi dei ban kyntait ia kino kino kiba wanrah da ka sorkar Assam. Namar ba khlem don ki jingmyntoi na ka sorkar Assam ruh ka dang nud ban kyntur pud bad lada don sa ki hok jong ka Assam ha ka khyndew ka shyiap jong ki sa katno tam ka kam lut ia baroh.
Shuh shuh ka seng kam pyrshah ia ka Committee halor jingiajan ki Pnar bad Karbi kumjuh ruh bad kiwei de ki jait bynriew kiba don ha khappud ka seng ka ai khublei ia ki haka nongrih ba ki lah ban pyniasuk bad pyniajan namar para briew donkam ka jingiajan bad ka jingiasuk ym ban iashun, hynrei ka seng ka kwah ban kylli na kane ka Committee balei ka sorkar jong ngi kam lah mo ban wanrah ia ki jingmyntoi kumba ki angnud na ka sorkar Assam.
Shwa ban dier ka por ka seng ka kyntu ruh ia ka sorkar Meghalaya ba ka dei ban peit ia ki jingeh bad ki jingdon jong ki shong khappud ka jylla ba ka dei ban pynbiang ia ki jingdonkam jong ki kumba ka Karbi Pnar Peace Committee ki dawa na ka sorkar Assam. La kyrpad ia ka sorkar jylla ba kan leh ia kaba donkam khnang ba ka khyndew ka shyiap ka kan ioh sah junom la junom hapoh ka jylla jong ngi hi.
