Shillong, Nailur 01: Ka jingialang jong ka cabinet kaba la long mynta ka sngi kala shim ia ka rai ban pyndon noh ia ka jingbit kaba la ai sha ka UCIL ha kaba ia dei bad ka kam Uranium. Ia kane ka rai la iathuh da u myntri rangbah ka jylla u Dr Mukul Sangma mynta ka sngi ha dien ba kala wan ka cabinet.
Haba kren ha ki nongthoh khubor u Dr Mukul u la ong bad a kane ka rai jong ka cabinet kaba la shim mynta ka sngi ka long ba la weng noh ia ka rai jong ka sorkar kaba rim kaba la shim ia ia ka rai ha ka 24 tarik Nailur 2009. Katkum katei ka rai ka long ba la ai jingbit ia ka UCIL ba kan leh ia kaba don kam ha kaba ia dei bad ka jingpynkhreh ia kane ka kam tih Uranium.
Hynrei mynta ka sngi ka cabinet la pyndam noh ia katei ka rai bad la bthah ia baroh ki tand sorkar kiba ia dei bad kane ka kam ba kin thoh sha ki bor ba dei ban pyntip ha kihalor kane ka rai jong ka sorkar. Da kane ka rai la weng noh ruh ia ka jingai ia ka jaka kaba 422 hectare sha ka UCIL .
Kumba ka long mynta na ka liang jong ka UCIL kam shym la lah ban pynsngewthuh sha ki paidbah ha kaba ia dei bad ka jingktah na ka jingtih Uranium ha kaba ia dei bad ka koit ka khiah bad kam shym la lah ban ia mir jingmud bad ki paidbah halor kane ka kam.
Na ka liang jong u myntri rangbah ka jylla u Dr Mukul u la ong ban a ka liang jong ka UCIL kala jam palat ia u pud ha kaba ia dei bad ka jingai jibgit jong ka sorkar kaba rim, lada peit na ka Expression of Interest (EOI) kaba la khot da ka UCIL kam dei shuh tang kata ka jingpynkhreh ban tih Uranium, hynrei ka long palat ia kata.
Ka sorkar mynta kan sa thoh sha baroh ki bor ba dei bad kane ka kam ban pyntip ia kane ka rai ba ka sorkar jylla da ka rai jong kane ka cabinet kaba la shim mynta ka sngi ba la pyndam noh ia baroh ki jingai jingbit jong ka sorkar barim ha kaba ia dei bad kane ka kam Uranium
U Dr Mukul u la ong ba ka sorkar ka long shai kdar haba ia dei bad ka nongrim halor kane ka kam Uranium ka sorkar kan nym leh kano kano ka kam lane ban shim kano kano ka rai khlem da ia mynjur lang ki paidbah jong ka jylla kum ki seng bhalang bad ki paidbah kiba don ka jingiadei ha kane ka jaka.
