Shillong, Jylliew 12: Ka iing dorbar thawain jong ka jylla Meghalaya mynta ka sngi ha ka jingiashong dorbar kaba kyrpang kala shim ia ka rai ban phah sha ka sorkar pdeng da ka jingthoh ban pyrshah ia ka jingpynbna jong ka sorkar lyngba ka tnad Ministry jong ka Environment Forest bad Climate Change Vide G.S.R.494 kaba la mih ha ka 23rd Jymmang 2017 kaba la pynmih ha kaba ia dei bad ka jingkhang “ The Prevention of Cruelty to Animals (Regulation of Livestock Markets) Rules, 2017”, ha kaba kane ka don shibun ki jingduna kaba la ktah ia ka ioh ka kot bad kum juh ia ka riti dustur jong ki briew kane ka jylla Meghalaya.
U Myntri rangbah ka jylla U Dr Mukul Sangma haba wanrah ia kane ka “Resolution” jong ka sorkar hapoh ka iing dorbar ban pyrshah ia katei ka ria jong ka sorkar, u la ong ba ki rule kiba la shna da ka sorkar pdeng katkum katei ka jingpynbna sorkar kala iaid lait na ka nongrim jong Animals Act. 1960, bad kane ka mushlia ia ka hok jong ki jylla namar kane ka kam jong ki sorkar jylla hapoh jong ka state list jong ka schedule VII.
Ki bynta kum ka Rep ka riang, Ban Ri jingri bad ban peit ia ki iew ia die ia thed ia ki mrad la buh ryntih hapoh ki kyndon 14,15, bad 28 hapoh jong ka state list jong schedule kaba VII jong riti synshar jong ka Ri India, ha kaba dei tang ki sorkar jylla kiba don ia ka hok ban shna ain, ka rule kaba 38 kumba ka long kala iaid sha bar jong ka ain jong ka sorkar pdeng hi bad ka rule kaba 28 kaba kren ha kaba ia dei bad ka jingiada ia ki mrad.
Katkum ka rule kaba 8 ka long ba ki iew die mrad ki dei ban long 25 Km sha poh jong ka jylla na u pud bad kawei ka jylla bad 50 Km na u pud bad kiwei ki ri jong ka pyrthei lada kane kan trei kam ha ei ja jylla Meghalaya kan don ia kiwei ia die ia thied ia ki mrad. U myntri rangbah u la ong ba ka jingdon ia ka doh ha kane ka jylla ka long haduh 23634 MT bad ka jingmih na ka jylla ka long tang 12834 MT bad kaba bun la thied na shabar. Dei namar kane ka jingduna doh ka jylla ka sa wanrah ia ka ‘Meghalaya State Livestock Mission 2017-2022” ban pynbun ka jingpynmih ia ka doh na ka jylla.
Da katei ka jingpynbna jong ka sorkar kam ktah ia ka ioh ka kot jong ki paidbah, ia ki riti dustur, ka niam ka rukom jong ki Paidbah kane ka jylla kumba la buh ha ka Riti synsahr jong ka Ri hapoh ka article Article 21 bad Article 26. Na ka liang jong u myntri rangbah u la kyrpad ia baroh ki dkhot jong ka iing dorbar ban ia kyrshan ia kane ka Resolution ban dawa na ka sorkar pdeng ba ka dei ban weng noh mardor ia katei ka jingpynbna jong ka sorkar pdeng ban lait na kino kino ki jingeh la ong u Dr Mukul Sangma myntri rangbah ka jylla.
Kiwei ki dkhot jong ka iing dorbar kiba la ia shim bynta ha ka jingiakren ha kaba ia dei bad kane ka resolution kaba la wanrah da ka sorkar hapoh ka iing dorbar ki long u Bah Ardent Basaiawmoit, Bah KP Pangniang, Bah Witting Mawsor na ka HSPDP, u James KP Sangma na ka NPP, u Bah Paul Lyngdoh, Dr Jemino Mawthoh, Bah Embhah Syiemlieh, Bah T Chyne jong ka UDP, Dr DD Lapang, Bah Rowell Lyngdoh na ka Congress, u John Lesley K Sangma, bad u Saleng A Sangma Ind.
