Shillong, Nohprah 19: Ki nonghikai 4th teachers kiba hikai ha ki SSA supported Schools Upper Primary hapoh ka jylla ha ka jingialang kaba la long mynta ka sngi 19 tarik hapoh Khasi National Durbar Hall Mawkhar, Shillong ki la rai ban leit pan jingpynshai na ka Myntri ka tnat pule puthi halor ka jingdawa ban kyntiew tulop ia ki kumba ia kane ka mat la dep ban iakren bad u Chief Minister Dr. Mukul Sangma ha ka 31 tarik August, 2016. Kumjuh ruh ia kane ka mat jingdawa la dep ban iakren bad ka Myntri ka tnat pule puthi ka Debora C. Marak ryngkat bad ka jingthoh ban pynkynmaw ha ka 4 tarik , October, 2016.
Da kawei ka jingmut ka jingialang ka la rai ba ka sorkar ka dei ban kren shai ha ryngkat bad ki jingthoh la kan pynkiew ne em ia ka tulop jong ki 4th teachers kumba la leh ia ki nonghikai Adhoc da kaba pynkiew 100 percent kiba dei na ka juh ka pla tyngka (State Plan) bad ka jong u 4th teachers ia kaba u CM ruh ha ka khot iakren ia ki nongialam ka Meghalaya SSA Schools Association (MSSASA) 4th Teachers Committee u la kren shai ban iada ia ka service jong ki 4th teachers bad ruh ban kyntiew noh ia ka tulop jong ki kumba la leh lang ia ki Adhoc, hynrei kaba pynlyngngoh ia ka synjuk ka long ba haduh mynta kane ka kam ka dang shu sah teng bad 4th teachers ki ioh ia ka jingsiew kaba tang T 6000/- shi bnai.
Kumjuh ruh ka jingialang kala rai ba la da ka jingiakynduh bad ka myntri kam long kaba seisoh ne ym lah ban pynshai ia kane mat , na ka liang jong ki 4th teachers kiba don 1521 ngut hapoh ka jingialam jong ka MSSASA 4th Teachers Committee kin shim noh da kawei ka lynti khnang ban pynioh ia la hok. Ban shu pynkynmaw, ka MSSASA ka la dawa ban kyntiew ia ka tulop u 4th teachers naduh u snem 2013 ia kaba ka sorkar ka la ieh bien bad leh shiliang khmat haduh mynta.
