Shillong, Jylliew 08: U Dr Mukul Sangma mynta ka sngi u la rwai ia ka jingrwai “Mynsiem jong nga to iaroh ia u Trai” kane ka jingrwai u la rwai ha dien ba u la dep ban kren kum u kongsan ha kane ka jingrakhe ia ka jingdap 125 snem jong kane ka skul.
Haba kren ha kane ka jingialang u myntri rangbah ka jylla u la ong ba ka jingbei pisa jong ka Asian development Bank (ADB) kam dei tang ban shna ia ki iing skul hynrei ka dei ban long ruh kumno ban hikai ia ki nonghikai ba kin dang pyntbit pynbiang ia ki ha ki kam hikai.
U la ong ba ha ka jaid bynriew kaba shim jaid na ka kynthei, ka long kaei kaei kaba biang eh ba la seng ia kum kane ka skul tang na ka bynta ki kynthei ban dang ai bor shuh ia ki wat ha ka jingnang jingstad, wat la ka sorkar jylla ka don hapdeng shibun ki jingeh hynrei kan ialeh katba lah ban pynrulong ia ka jingangnud jong ki paidbah.
Ka jinglah ban pyniaid ia kane ka skul haduh kat kine ki snem ka long da ka jingkyrkhu jong u kyrnrad na jrong. Ka jinghikai ha kane ka juk na ka bynta ki samla ka long ban ai ka jinghikai ba kumno ki lah ban ieng ha la ki jong ki kjat ynda ki la dep ia ki jingpule ki jong ki kilah ban shen ia ki lad ki lynti ba kin ioh ia ka kam ka jam.
Ha ka jingkren jong ka kong Roshan Warjri kala ong ba ia kane ka skul la seng ha ka nongrim jong ka jingieit, ka jingsuk bad ka jingiaieit para briew. Kane ka skul la seng halor ka nongrim ban kyntiew ia ka jaid bynriew . Ia kane ka ksul la seng ha u snem 1892 bad kane ka ksul kala pynmih shibun ki riew khraw, kiwei kiba la ia don lang ha kane ka skul ki long u Rev (Dr) H Rymbai u ba ialam ia ka jingduwai bad ka kong H Mawroh, Principal kala ai ia ka jingai khublei, nalor kine la don lang u Bah DD Lapang, RV Lyngdoh .
