Shillong, Nailur 16: Sa shisien, ki liang pyrshah hapoh ka iing dorbar thawain jong ka jylla mynta ka sngi kila weng noh ia ka “No Confidence Motion” pyrshah ia u shongknor jong ka iing dorbar u AT Mondal ia kaba la buh ban ia kren mynta ka sngi hapoh ka iing dorbar, ha dien bala dep ki kam jong ka sorkar baroh.
Ia kane ka mat jingiakren No Confidence Motion kaba la buh ban ia kren mynta ka sngi, la buh haka number kaba 25 jong ka kalender jong ki mat jingiakren kiba dei hapoh ka iing dorbar thawain jong ka jylla, ha kaba u James K Sangma MLA jong ka NPP u dei ban pan ia ka jingbit jong ka iing dorbar katkum ka Riti synshar jong ka Ri India hapoh ka Article 1799 ( C ) jong ka Riti Synsahr jong ka Ri.
Haba baroh ki kam jong ka sorkar kila dep, u shongknor jong ka iing dorbar u la pynbna ba ka ophis jong ka Meghalaya Legislative Assembly , kala ioh pdiang ia ka shithi na u James K Sangma , ha kaba u la kdew ba u kwah ban weng noh ia kane ka resolution ban weng noh ia u shongknor jong ka iing dorbar.
Ha kane ka sngi ka iing dorbar kala passed ia ki san tylli ki bill bad kito ki long, ka Meghalaya Appropriation (No III) Bill, 2016, Ka contingency fund of Meghalaya (Amendment) Bill, 2016, ka Meghalaya State Language (Amendment) Bill, 2016, Ka Meghalaya Residents Safety and Security, Bill 2016, ka Meghalaya Parliamentary Secretaries(Appointment, Salaries Allowances and Miscellaneous Provision) (Amendment) Bill, 2016 bad ka Legislative of Meghalaya (Members’ Salaries and Allowances) (Amendment) Bill 2016.
