Ampati, Naitung 24: U myntri rangbah ka jylla u Dr Mukul Sangma mynta ka sngi u la sam ia ki masi khem dud sha ki san tylli ki seng treimon sngewbha kiba dei na ka Betasing C&RD Block jong ka South West Garo Hills hapoh jong ka skhim Livestock Mission jong ka sorkar jylla ia kaba la pynlong ha Ampati.
Ia kane ka jingsam ia kine ki masi khem dud la pynlong da ka tnad ri mrad jong ka sorkar jylla da ka jingiatreilang bad ka Basin Development Unit, jong ka South West Garo Hills ha kaba la don lang ruh ka Chairperson, Meghalaya Resources bad Employment Generation Council, ka Dikkanchi D. Shira, ka Chairperson, jong ka State Development Reforms Commission, ka Bluebell R. Sangma, CEM, jong ka GHADC u Boston Marak, Deputy Commissioner C.V.D.Diengdoh bad kiwei kiwei ki heh sorkar.
Na ki 10,000 tylli ki long iing ha ka jylla, 5000 tylli ki long iing kin ioh naki lai tylli ki block na Garo Hills bad lai tylli ki Block na Khasi-Jaintia Hills ki ban ioh ia kine ki masi khem dud kiba lah ban pynmih shibun ka dud ia kiba la tip kum ki masi Holstein Friesian (HF).
Ha ka jingkren jong u myntri rangbah ka jylla u Dr Mukul Sangma u la ong ba ka kam pynmih dud kawei na ki kam ba roi sted bha bad ka jingdon kam ka long ha kiba bun ki liang ia ka dud bad kane kan wanrah ia ka jingai kam ai jam ia ki paidbah ha ka jylla. Ka sorkar ka ialeh katba lah ban peit ba ki paidbah na ki nongkyndong kimd ei ban kiew sha ki jaka sor.
Dei halor kane ka nongrim ba ka sorkar ka kwah ban iohi ba ki briew ki dei ban kiew ha ka ioh ka kot ka jong kiha ki jaka kaba ki sah ban leh ia kane ka sorkar kala wanrah ia kane ka Livestock Mission da ka jingiatreilang bad ka Integrated Basin Development and Livelihood Promotion Programme (IBDLP).
U myntri rangbah u la ong ba kine ki masi ki lah ban ia dud haduh 40 liter ha ka sngi sngi bad ka jingmih kan nym duna ia ka T.16000/- tyngka ha ka shibnai. Na ka liang jong u myntri rangbah u la ai ka jingkular ia ki nongrep ba ka sorkar kan sa thied ia ka dud bad nalor kata ka sorkar kan sa ai jinghikai ia ki samla ba kumno ban pynmih ia ki jingbam na ka dud.
