Shillong, Iaiong 24: U MLA bad u MDC ka Mawlai constituency u Bah Process T Sawkmie ha ka Lah sngi U Blei u la poi jurip shisien jurip san tylli ki surok ha ka shi sngi ha ryngkat ka jingdonlang u Excutive Engineer ka tnad PWD, Bah C Kharmudai bad kiwei.
Kine ki san tylli ki surok ba u la leit jurip ki kynthup ia ka surok ban leit sha Sanker hospital, ka surok Mawkynroh-Umshing, ka surok ha Mawlai Nongpdeng, ka surok bad nala ha Iewrynghep bad ka nala ha Mawlai Nongkwar.
U la sdang ia ka jingjurip jong u na Mawlai Mawroh, ka surok bye-pass, ka surok Sanker Hospital, kabym dei jong ka tnad PWD, hynrei u MLA Mawlai u la kular ban mang skhim kyrpang na ka bynta ban maramot pynbha ia kane ka surok, kaba long ka surok kaba jan baroh ki briew ha ka jylla ki wanrah ia kiba ieit bathoin ki jong ki ban phah sumar ia ki ha kane ka hospital.
“Kane ka dei ka surok ha kaba baroh ki nongshong shnong ka jylla ki wanrah ia kiba pang ban phah sumar ha kane ka hospital, kumta ka long ka burom kaba khraw na ka bynta ka Mawlai, te lada ka surok ka sniew kumno ki bapli kin sngew. Namarkata ka daw wartla kam dei jong ka PWD, ngan mang na ka MLA skhim ban maramot pynbha ia kane ka surok na ka bynta ka burom jong ka Mawlai constituency,” ong u MLA Mawlai sha u nongthoh khubor.
Na ka liang u Dr. Sandy Syiem, uba khmih bad pyniaid ia ka Sanker Hospital u la pynpaw ia ka jingsngewnguh ia u MLA halor ka jingshimkhia jong u. Na Sanker, u la poi jurip sa ia ka surok Mawkynroh-Umshing kaba ju shlei um tang mar ia slap ha ryngkat ka jingdonlang u Rangbah Shnong bah L.Nongkhlaw bad ki nongkitkam shnong.
Hadien kane u la leit sa sha Mawlai Nongpdeng ban jurip ia ka surok kaban siang halor ka kharai bad ka nala kaba dei ka khappud Mawlai Nongpdeng bad ka skul Sacred Heart Boys, kumba katto katne meter la dep siang lyngba ka MDC Skhim jong u Bah PT Sawkmie bad mynta ka donkam ban siang lut shaduh bakut bad hangne ruh la don ryngkat u rangbah shnong bah KW Chyne.
Nangne u la leit ban jurip sa ia ka surok ha Mawlai Iewrynghep, kaba donkam ia ka nala, namarba ki um jaboh ki tuid nalor ka surok ha ryngkat ka jingdon lang u rangbah shnong bah Kynsai M Lyngdoh bad ka Seng Samla Mawlai Iewrynghep.Khatduh u la poi sha Mawlai Nongkwar ban jurip ia ka nala ha Block 11, kaba ju khot ka Patarim ha ryngkat ka jingdon lang u rangbah shnong, Bah Rap Thangkhiew bad kiwei.
Hashwa kane jingjurip u MLA Mawlai u la pynpaw sha u nongthoh khubor ba ki la dep shong jiingialang bad u Excutive Engineer bad u SDO ka Umsning Division PWD bad na ka liang jong ki, u la iathuh ba ki la dep mynjur ban maramot pynbha ruh ia ka surok VIP ba ki ju khot, kaban sdang naduh ka Lummawsing, Umsaw-Mawjynrong, Nongkohlew, Mawsiatkhnam, Umrynjah ter ter shaduh Madan Mawkhar. Halor kine ki surok bad nala u MLA u la ong ba un sa mang pisa katkum ka jingdonkam jong ki.
