Shillong, Nohprah 08: Ki nongtrei jong ka Mawmluh Cherra Cement Limited (MCCL) hapoh jong ka lama jong ka Mawmluh Cherra Employee’s Union (MCEU) mynta ka sngi kila sdang ia ka jingiakhih da kaba shah thngan khlem buh por ha Head Ophis jong ka kompnei ha Lachumier.
Katkum ka jingiathuh jong u president ka seng u bah Shanlang Diengdoh u la ong ba katkum ka jingbit kaba la ioh na ka Deputy Commissioner jong ka East Khasi Hills District la shah ban ia shong shah thngan tang 20 ngut ha ka shisien shong bad ia ka jingbit ki hap ban pan man ka sngi katba ki dang bteng ia ka jingshah thngan.
Ka jingwan kiew jong ki sha Shillong ban pynlong ia kane ka jingiakhih ka long ba kim don lynti shuh da kumwei pat namar ki jingiakhih kaba kila dep ban pynlong saw sngi lynter sha Sohra kam shym poi sha kano kano ka thong namar ka sorkar kam shym la sngap ia ki.
Dei halor kane kum ka MCEU kala shim ia ka rai ban pynsngew ia ka sorkar kila wan kiew sha Shillong ban pynlong ia kane ka jingiakhih da kaba shah thngan kaba khlem buh por bad kin iaid bteng ia kane ka jingiakhih haduh ba ka sorkar kan da khot ia kren ia ban ia kren ia ki jingdawa kaba kila buh ha khmat jong ka.
Ha ka jingkren jong u bah Pynskhem Lyngdoh general secretary, u bah Arnol Thabah bad u bah Wanlang Thabah ki nongkit kam jong ka seng MCEU kila pynpaw ba ka jingkwah ka jingki ka long ba ka sorkar ka dei ban siew ia ka ba dei hok ka jong ki katba kam pat lah ban pyniaid ia ka karkhana dewbilat.
Lada ka sorkar ka pyniaid noh ia ka karkhna dewbilat kum kaba long ka karkhana hi kala pynmih ia ka tulop jong ki kumba ki juh long, haba kane ka karkhana kam don jingmih namar ka jingleh ka sorkar, ka sorkar ka dei ban siew ia ka tulop jong ki nongtrei.
Kum ka MCEU, ka dawa ba ka sorkar ka dei ban siew noh ia ka tulop jong ki kaba la sah tang mynta la palat 15 bnai, ka dei ban siew noh ia kaba kila trei palat ia ka por trei kam kaba la shah naduh u snem 2013 bad ia ka Arear kaba la sah mynta la 7 snem lynter bad ia kiwei ki jingsiew kum ka bai dawai.
