Shillong, Iaiong 08: Ka shad Suk Mynsiem ba shisien shisnem bala pynlong da ka Seng Khasi Kmie Mawkhar kaba lai sngi lynter ha Mawdan Weiking kala sdang mynta ka sngi bad ia kane ka sngi sdang la tip kum ka sngi noh kjat.
Ha kane ka sngi kiba wan ia shim bynta kiba bun ki dei na ka seng Kmie Mawkhar namar ka dei ka sngi iuh kjat bad ha ka sngi baar bad ka seng balai ki nongwan ia shim bynta ki long na kylleng ki lum Khasi kiba dang bat ia ka niam tynrai.
Ka shad Suk Mynsiem ka long ka shad ainguh ia u trai nongbuh nongthaw u la ba kyrkhuh kyrdoh bad ban kyrpad ban biang ia ka trei ka ktah ba, ka shad Suk Mynsiem ka dei ruh ban pynisha ka pyrthei ba kum ka jaidbynriew Khasi don la ka jong ka Riti Dustur ka Riam ka khor tynrai.
Ki riew rangbah ka Seng Khasi kila ia lum ialang ha iing seng ha Mawkhar ban pynglong ia ka duwai phirad shuwa ban leit sha Madan Weiking bad haba la poi sha Madan Weiking la sdang da ka jingduwai bad bud sa ka shad Suk Mynsiem.
