Shillong, Iaiong 09: Ha dein ba la mih ka jingkynthoh na u President jong ka Voice of the People Party u bah Ardent Basaiawmoit ha ka jingialap Election ka ba la long ha Umsning ha ka ba u la kynthoh ba ia u bah Pyniaid Singh Syiem ba la shuthung da ka sorkar Jylla kum u CEM ka KHADC.
U bah Pyniaid u la ther kylla ia u bah Ardent da ka ba ong ba kane ka dei ka khubor ialam bakla. Ha ba ioh ban iakren bad ki lad pathai khubor na ka liang u CEM ka KHADC u bah Pyniaid Singh Syiem u la ong ba kane ka jingiakren jong u bah Ardent ka long kumba u khein dewthala ia ka Meghalaya High Court bad na ka liang u bah Pyniaid shen unsa ujor sha ka High Court.
U bah Pyniaid u la ongruh ba ia u CEM ka KHADC la jied da ki MDC hapoh ka iingdorbar jong ka KHADC ha ka ba u la kdew ba kat kum ka AD Rule ka kyndon kaba 20 jong ka Assam and Meghalaya Autonomous District Rules 1951 ka kdew iaka rukom thung ia u CEM bad ki EM ha ka ba ka la kdew ba u Governor jong ka Jylla u don ka bor ban thung ia u CEM bad EM ka KHADC.
U bah Pyniaid u la ong ruh ba ka la don ka rai jong ka High Court ka ba la pynmih ha u snem 2020 ha ka ba la batai ba ia u CEM bad ki EM kacouncil la thung da u Governor kat kum ka AD ba 20 jong ka Council.
U Bah Pyniaid u la ong ba kane ka jingkren laplah jong u bah Ardent ka lah ban long kum ba khring sha ka Contem of Court ha ka ba na ka liang u CEM u bah Pyniaid Singh Syiem u sa pyntip sha ka High Court ba ki don ki briew ki bym sngew thuh ia ka ain.
U la kynthoh ruh ba kat u briew u ba la long ar sien kum u MLA jong ka Nongkrem um tip ia ki ain kane kan wan rah ia ka jingialam bakla ia ki paidbah.
