Shillong, Rymphang 15: U Bah Kimfa S Marbaniang MLA jong ka Rambrai Konstitwensi mynta ka sngi u la leit ban ai da ka jingujor sha ka Meghalaya Human Right Commission (MHRC) pyrshah ia ki pulit jong ka jylla Assam kiba la bom pathar ia ki briew hapoh shnong Umsawli kaba hap hapoh ka konstitwensi ka jong u.
Ha dien bala ai ia ka jingujor sha u superintendent u bah A Nongbri ka MHRC, u bah Kimfa haba kren ha u SP News Agency u la ong ba ka jingiarap jong ki paidbah ia ka MeCL ban ring ia ki ksainar light ka long ba ha ka sngi u blei ka don ka jingiaseng ki paidbah ki kwah ban ioh noh ia ka light.
Hynrei ki pulit jong ka Assam kiba don ha jan jong katei ka jaka kila wan tur bad khanglad ia kane ka jingtrei dei hangne ba kala mih ka jingiakren kaba la kham khluid bad ki briew kiba don ha katei ka thain bad ki pulit jong ka Assam kila bom pathar ki riew paidbah.
La iathuh ba kane ka jingbom jong ki pulit kala long na phang ia ki kynthei khynnah bad ia kiba mynsaw la kit sha Nonglang PHC bad ia kiba la kham mynsaw la kit sha Nongstoin Civil Hospital ban phah sumar, la ong ka jingjia baroh kawei na ka jingleh jong ki pulit Assam u la kynnoh.
Halor ka jingkynnoh ba ka don ka jingiakawang maw kam shym don kaba kum kata, hynrei ki pulit Assam kila kem ia u wei u briew jong ka MeECL bad ia u Secretary ka shnong Umsawli khlem daw.
U MLA jong ka Rambrai u la ong ba kane ka jingujor kam kut tang hapoh jong ka MPHRC, hynrei un phah ia ka jingujor sha u myntri rangbah ka jylla u Conrad K Sangma, sha u myntri kam poh iing u James K Sangma, sha u Chief Secretary ka jylla, sha ka Meghalaya Women Commission.
