JOwai, Jylliew 27: Ka AJYWO sengkmie ka pynpaw ia ka jingsngewkhia kaba jur haduh katta katta halor ka jingsdang wan ka jinglynshop jong ka jingshahthngan ia ki paidbah jong ka Jaintia Hills khamtam kiba na East Jaintia Hills na ka daw jong ka jingkhang tih bad khaii dewiong ba kynsan jong ka National Green Tribunal ha ka jylla Meghalaya.
“Da ki phew hajar ngut ki paidbah jong ka Jaintia Hills khamtam na East Jaintia Hills District ki la im mynta ha ka jingkordit bah ka bym pat ju jia koit ha ki por kiba la leit na ka daw jong ka jingsdang jong ki paidbah ban mad ia ka jingshahthngan namar ka jingkhang tih bad khaii dewiong ba kynsan kynsan jong ka NGT ha ka jylla Meghalaya. Kane ka jingkhang tih dewiong ba syndet jong ka NGT ka la ktah jur khamtam eh ia kito kiba im kyndoi jakpoh da kaba bylla sngi ha ki kam tih, thep dewiong bad ruh jied mawsleit”, ong u Bah M H Dkhar President jongka AJYWO sengkmie.
U Bah M H Dkhar u la ong ba ha ka jingiakynduh ba dang shen jong u Bah M H Dkhar bad ki katto katne ki long ϊing ba duk ki ba im jakpoh ha kaba bylla dewiong ha ki por mynshuwa, kine ki la pynpaw ia ka jingsngewsih kthang kaba jur halor kane ka jingkhang tih dewiong jong ka NGT ha ka jylla Meghalaya. Ki la ong ba namar ba ka long kaba kyndit kyndit ka jingkhang tih dewiong, kine kim don lad shuh da kumwei pat ban wad da kawei pat ka lad ka lynti ban kamai jakpoh hynrei mynta ki shu shong sngewsih bad ap satang ia ka sngi jong ka jingiap ka ban sa wan rong noh ia ki na ka daw jong ka jingiapthngan”.
“Don napdeng jong kine ki ba la hap ha ka apot, kiba la byrngem wat ban pyniap noh ia la de da kaba phasi lane dih da ka bih iala de bad ia la ki khun ki kti ruh namar ki ong ba kim lah ban shah ban peit bad iohi ia la ki jong ki khun ba kin ngat ha ka jingiapthngan nangne sha khmat” la bynrap shuh shuh u Bah M H Dkhar.
Ka AJYWO ka pynpaw ia ka jingsngewsih kthang haduh katta katta ia kane ka jingkhang jong ka NGT ban tih bad khaii dewiong syndet syndet ha ka jylla Meghalaya khlem da ailad shuwa ia ki paidbah ban nang wad shuwa ia ki lad ki lynti ban kamai jakpoh da kiwei pat ki jaid kam.
Ka seng, ha ka jingiadei bad kane ka jingshahtngan jong ki paidbah, shen kan sa thoh ia ka dorkhas jong ka sha u Prime Minister jong ka Ri India, u Narendra Modi bad ruh sha u Union Minister jong ka Ministry of Coal jong ka sorkar India ban kyrpad ia ka sorkar India ban pyrkhat sngewsynei lem ia kane ka apot kaba ki lakh ngut ki nongshongshnong jongka jylla Meghalaya ki la ia kynduh mynta bad ruh ban wad iaki lad ki lynti ban iarap ia ki khnang ba ka jingiapthngan kan ym ioh ban rong ia ki.
“Ka AJYWO ka dawa ruh na ka sorkar Meghalaya ba mynta ka la dei ka por ia ka ban wad noh ia ki lad ki lynti ki ban iarap ia baroh kine ki lanot ki ba la shah ktah na ka daw jong ka hukum jong ka NGT bad ba ia kane, ka sorkar ka dei ban leh noh wut wut shwa ba ka jingiap kan rong noh ia ki hajar hajar ngut ki nongshongshnong jong ka Jaintia Hills” ong shuh shuh u Bah M H Dkhar.
“Ka seng ka kyrpad ruh ia ka National Green Tribunal ba ka dei ban pyrkhat lem ia kine ki phew phew hajar ngut ki mynsiem ba kordor ki ba la sdang iap thngan noh mynta na ka daw jong ka hukum khang tih bad khaii dewiong jong ka” la pynkut u kyrwoh na ka AJYWO.(SP news)
