New Delhi, Kyllalyngkot 31: Ka Asian Centre for Human Rights (ACHR) ka kyntu ia ki pulit jong ka nongbah Delhi ba kin ai ka jingiada da kaba pyntrei kam ia ka ain Scheduled Castes and Scheduled Tribes (Prevention of Atrocities) Act, 1989 ha dien ka jingshah pyniap jong u Nido Taniam, samla pule na ka jylla Arunachal Pradesh.
Une u samla u la shah pyniap ha Lajpat Nagar kawei na ki iew kiba don ha nongbah New Delhi mynta ka sngi. Kane ka jingiakajia ka long hapdeng kine ki samla pule bad ki nongshong dukan halor ka jingkren khlem akor ia ka rukom buh shniuh jong u Taniam.
La ong ba ia u Taniam la bom la tied da ki briew kiba don kum hynniew haduh phra ngut ki briew, hynrei na ka liang jong ki pulit jong ka nongbah Delhi kim shym la lah ban ai ka jingiada bad une u samla u la iap ei.
Kumba ka long mynta ha nongbah Delhi ka juh don ka jingkren bein ia kiwei ki para jaid bynriew bad kane ka long pyrshah ia ka Indian Penal Code, na ka liang jong ki pulit ki dei ban pyntrei kam ia ka ain Scheduled Castes and Scheduled Tribes (Prevention of Atrocities) Act bad kem ia kitei ki nongpyniap briew, la ong u Suhas Chakma, Director of Asian Centre for Human Rights.
Na ka liang jong ka ACHR ka dawa na ki pulit jong ka nognbah Delhi ba ki dei ban kem ia ki nongpyniap briew bad dei ban pynshitom ia ki katkum ka ain.(SP News)
