Shillong, Naiwieng 08: Mynta ka sngi kala don ka jingiakynduh hapdeng ki nongkit kam shnong ka HIma Lyniong bad u myntri rangbah ka jylla u Dr Mukul Sangma ha kaba u myntri ba dei peit ia ki kam bor ding u Bah Sngewbhalang Dhar ruh u la ia don lang.
Ha kane ka jingiakynduh kila ia kren ia ka jingjia kaba ha jia ha ka 27 tarik jong u bnai Risaw ha kaba 6 ngut ki mynsiem briew kila duh na ka daw jong ka jingshort jong ka light. Ha kane ka jingiakren na ka liang jong u myntri rangbah u la ong ia ki nongialam ka hima ba ka sorkar shen kan sa pynlait noh ia kane ka pisa 6 lak sha kata ka long iing kaba mat ia kane ka jingjia kaba sngewsih.
Haba ia dei bad ki wiring hapoh jong ki iing briew kiba la ieng ha katei ka jingjia ka MeECL kan pynshna sha baroh kito ki iing kiba la julor bad kin ai ruh ia ki meter box. Ia kane ka kynhun la ialam da u MLA jong kane ka jaka u Bah Kennedy Khyriem bad u Bah Lamphrang Blah MDC.
U Myntri rangbah u Dr Mukul Sangma u la ong ba ha kane ka jingiakynduh mynta ka sngi kila ia kren ruh ia ki lad ki lynti ba kumno ka MeECL ka dei ban shim ban peit ba kum kane ka jingjia ha dien ha bud kan nym jia shuh. La bthah ban shna ia ka committee ha kaba ki nongkit kam shong kin ia don bynta lang bad ka MeECL ban ia peit ia ka bha ka miet ha ki shnong ki thaw.
U myntri rangbah u la ong ba bun na ki line b aba pynur ia ki ksainar light kila kut ka por kum ka line ban leit sha Mawsynram, Nongstoin bad na Mawlai sha Nangalbibra ia kaba hap ban leh ei ei ban pynbha ia ki. Ka MeECL ka hap ban peit ia kane ruh bad ban leh ia kane don kam ia ka jingiatreilang lang ruh jong ki paidbah.
