Jowai iaiong 09:Ki 5 tylli ki sengbhalang na Jaintia, kiba kynthup ia ka AJYWOSengkmie, KSU-JHDU, SRS-EJH, HNYF-EJZ bad ka FKJGP Khliehriat Circle,kiba ha ka jingshisha ki la dei ban pynbna noh ia ka jingiakhih ba tyngeh jong ki ha kine ki khyndiat sngi ba la dep mar iadep ka jingialang paidbah jong ki ha Khliehriat ban pynbor ia ka sorkar ban maramot ia ka NH 44, ki la hap ban pynsangeh noh shwa ia kane ka jingiakhih jong ki namar ba don ka Election MP bad ka jingpakhang shnnong jong ka HNLC bad ruh sa ka jingdon jong ka jingiaseng jong ka KJP Assembly mynta ka taiew ha ka Balang Moolang, East Jaintia Hills.
“Hooid, ki paidbah ki la thrang dik dik ba ngin pynlong jingiakhih noh da kaba tyngeh haEJHD mar iadep ka jingialang paidbah ha ka Nongbah Khliehriat, hynrei ka jingsangeh iakhih jong ngi ha kane ka taiew kam dei ka jingleh khnang jong ngi kum ki 5 seng hynrei dei namar ba don kitei ki daw ba la kdew haneng ki bym lah ban kiar.” La ong u Samla SS Niangti, General Secretary ka KSU-JHDU.
U Samla Niangti u la ong ba kitei ki san seng shen kin sa pynbna ia ka jingiakhih ba tyngeh jong ki ha kane ka taiew ban wan mar iadep ka jingiaseng KJP Assembly ban pynbor ia ka sorkar ban maramot noh ia ka NH 44 naduh Malidor haduh Soomer. Kitei ki 5 seng ki kyrpad ia ki paidbah ba kin iai shah bad ki sa ktto katne sngi.(SP News)
