Shim ka Shillong Lajong FC ki rangsamla Khasi ban ia lehkai na ka club

Shillong, Jylliew 11: Ka shilling Lajong FC mynta ka sngi kala ia soi ia ka kontrak bad ki 10 ngut ki rangsamla khasi bad ka club ba kine ki samla kin ialehkai na kane ka kynhun ha kine ki snem bad kine ki 10 ngut ki dei kiba dang khi dang san ia kiba la tip kum ki U-15. Kine ki shiphew ngut kiba la ibit da ka club ban shim ia ki ki dei kiba la wan ia shim bynta ha ka jingialehkai Sub-Junior National Championship kaba la long ha Calicut, Kerala. Ka kyrteng jong ki ki long u,Benjamin Diengdoh na Pynursla, Sangti Janai Shianglong na Mylliem,Glenys Godfrey Lynrah na Mylliem, Iohborlang Lyngdoh Lyngkhoi na  Nongpoh, Fairlystar Suting na  Pahamsyiem, Shankerlang Kshiar na Sohryngkham, Urbanity Makroh na Jirang, Jefferson Kharbuli na Sohryngkham, Bankyrsan Syiemlieh na  Mawsynram bad u Henry Ford Nongneng na Umran. Nalor kitei shiphew ngut kiba dei ki rangsamla khasi ka Shillong Lajong FC kala shim ruh ar ngut ki rangsamla na ka jylla Mizoram ban pynrung ia ki hapoh kane ka club bad kita ki long u Joshua V. L Rinliana bad u K. Lalfakzuala. Ia kine ki rangsamla baroh kin sa shah hikai kyrpang hapoh jong u nonghikai u Bah Bobby Nongbet. U General Manager u Bah Habamutlang Lyngdoh, u la ong ba u dap da ka jingsngew kmen ban iohi ba kine ki rangsamla jong ka jylla kila ioh ia kane ka lad ban don ha kane ka club bad ka thong jong ka Club hi ka long ba ki kwah ban iohi ba ka club kan long ka kynhun kaba nyngkong ha ka jingialehkai kynjatball.