Shillong, Nohprah 28: Ka Khasi Students’ Union (KSU) Mawprem Circle ha ka jingsngewkhia bad shon mynsiem halor ka jingkynrei kynsan jong ki samla ka thain Mawprem ban kyrni ia u droks ka la shim ia ka sien jam ban ia trei lang noh bad kawei ka NGO kaba tip kum ka Manbha Foundation ban ai jinghikai ia ki khynnah skul ka thain halor ka jingma jong u droks.
Ka Manbha Foundation ka dei kawei na ki seng trei mon sngewbha kaba ai jingiarap ia ki briew kiba la ngop ha u droks ban lait noh na u bad ka ju ai jinghikai ruh ia kito ki bym pat ngop ban kiar na kum une u jingdih. Ia kane ka prokram la ai kyrteng da ka “Awareness Campaign on the Ill Effects of Drug Abuse” bad la pynlong ia kane ka prokram ha lai tylli ki skul ha ka thain Mawprem kiba kynthup ia ka Sein Raij Secondary School, Mawprem Presbyterian Secondary School bad ka Mawprem Modern Higher Secondary School.
Ka jingthmu jong ka seng ban pyniaid ia kane ka jait prokram ha kine ki skul ka long ban ai jinghikai lyngba ka Manbha Foundation ia ki khynnah skul naduh klas 7 haduh klas 12 halor ki jingma lada ki briew ki ngop ha u droks. Ka seng kala iohi ba bun ki samla kiba la kham heh ka rta ki la ngop ha une u jingdih bad kaba kham ima ka long ba kito kiba la ngop ki ju hikai pat ia ki khynnah ba dang rit ban dih ia u drok.
Kumta ka seng da ka jingthmu ban pynkut noh ia ka jingdih drok ha kane ka pateng ka la shim ia kane ka sien jam ban pynsngewthuh ia ki khynnah, ki kmie ki kpa bad ki nonghikai halor ka jingma jong u droks. Ki nongai jingkren na ka Manbha Foundation u Malsawma Pachuau u la hikai ia ki khynnah ba kumno ka jingdih droks ka ktah ia ka jinglong briew, ka koit ka khiah, ka iing ka sem bad ka imlang ka sahlang.
U la batai shaphang kumno u drok u pynhiar ia ka jingkhia ka met, ka jingring ki khmat bad kumta ter ter, hynrei u ong lada shem kine ki jingkylla ba long physical ha u khynnah ka mut ka la long dier por ban teh lakam ia ka jingdih droks jong u. Ha ka jingsngew u Malsawma u ong ba ka por ba dang suk ban teh lakam ia ka jingdih droks u khynnah ka dei lyngba ka jingpeit pyrman ia ka rukom long ka jong u lane ka behavioral effects kum ka jingkylla ka jingsngew, ka jingsngewtynnad ban shong marwei bad kumta ter ter.
U la ong ruh ba kane ka long kaba kongsan bha ia ki kmie ki kpa bad ki nonghikai ban leh eiei lada ki iohi kum kine ki jingkylla ha u khynnah. Shuh shuh U Pachuau u la ong ruh ba nyngkong hi kiba mad ia u droks ym dei ba ki kwah ban long kyrni (addict) hynrei ka dei tang ban pynhun ia ki paralok (peer pressure) lane ban pyntngen ia ki jingsngewsih. Dei hadien ban ki iai pyndonkam ia u droks ba ki khynnah ki sa kyrni namar ka met ka jong ki kam lah shuh ban kyrshan khlem u droks .
U samla Barry Kharmalki na Manbha Foundation u long uwei na ki samla uba la ngop ha ka jingdih droks bad mynta u la lah ban ieh hadien ka jingiakhun ba shitom. Une u samla u la ia bynta lem bad ki samla pule halor ka jingkordit ka jong u haba u la kylla mraw ha ka jingdih droks. U la kyntu ia ki khynnah ba ki dei ban don ka mon ban ong em ia kino kino ki jingpynshoi na kino kino ki liang bad ba ki dei ban minot thop ha ki jingpule ki jong ki. Ia kane ka prokram la pynlong nongkong ha Sein Raij Secondary School ha mynta u bnai ha Mawprem Secondary School bad ha Mawprem Modern Higher Secondary School .
