Jowai, Naitung 08: Kumba ju long shisien shisnem ka jinglehniam bad ka rong Behdeinkhlam, hadien ba la dep ka bet ka thung ia u Symbe (Symbai) u Phniang ha ki Hali ki pynthor, ki khun ka Seinraij Jowai kin pynlong ia kane ka jinglehniam bad ka rong Behdeinkhlam ha Jowai ka ban sdang naduh ka 10 tarik bad kut ha ka 13 tarik mynta u bnai.
Ia ka jinglehniam bad ka knia ka khriam ha ki Blei ki Dkhen la ong ba ka la iaid naduh ki sngi bad ki tiew ba la dep bad ka 10 bad 13 tarik ka long tang ki sngi ban pynkut ia kane ka jinglehniam bad ka rong behdeinkhlam da kaba rah ia ki Rot Rong sha Pungaitnar.
Ka jingwan ka jinglehniam Behdeinkhlam ka wan rah ia ka jingkhuid jingsuba bad jingphyrnai khrek ki Dong ki Shnat da ka jingpynkhuid pynpliah ki nongshong shnong ym tang ia ki iing ki sem, ki mynshem, hynrei ia ki lynti ki syngkieng ha ki dong ki shnat bapher bapher jong ki.
