Shillong, Risaw 31: U Director General ki pulit jong ka jylla Meghalaya u N Ramachandran u la shong thait noh mynta ka sngi,ha kaba ia ka jingpyndon burom khatduh ia u ka la long mynta ka sngi ha jaka ai jinghikai ia ki pulit ha PTS, Shillong. Ha kane ka sngi la jan baroh ki heh pulit jong ka jylla ki la ia don long ban ai ka jingkhublei khatduh ia u kum u heh duh jong ki.
U Ramachandran u la shimti kum u DGP ka Meghalaya ha u Nailur, 2011. U la pynpaw ia ka jingsngew kmen ban bat kum u DGP ka Meghalaya khamtam haba ki kam pyntreikam ha ka jylla ki la kham duna.
U la ong ba ka long ka jingsah kynmaw ba ia ka Tranpsranecy Recruitment Policy (TRP) la pdiang ban pyntreikam ha ka thungkam thungjam ha ka jylla da ka rukom kaba khuid bad kaba shai. Hapoh kane ka policy, u la ong ba la lah ban ban thep kam haduh 117 ngut ki pulit Sub-Inspector bad kine ki dang leit shah hikai ha Haryana police Academy ha Madhuna. “ngin sa pynrung ruh sa 2000 ngut ki pulit bad ka jingpynrung ka dang iaid shaphrang. Nga kyntu ia ka tnad pulit ban pynlong ia ka jingthungkam kaba khuid”, la ong u DGP ban shongthait noh.
Kumjuh u la ong ba ka tnad pulit ka jylla kan sa buh noh ia ka skul police ka Police Academy bad ka pisa kaba T. 50 klur la ioh na ka 13th Finance Commission ka sorkar India. Kane ka skul jong ki pulit kan long kaban iaryngkat bad kiwei ki jaka hikai ba pawnam ha ka ri, u la ong.
U DGP u la ong ruh ba ka skhim Safe-Secure Shillong kaban la pyntreikam da ka sorkar la kyrmen ba kan iaid sted ban pynurlong ia ka jingthmu kumba la maitphang bad da ka jingshimti u DGP ban wan.
“Nga khublei iaphi baroh ki pulit ka Meghalaya bad nga kitbok ia ki baroh”, la pynkut u DGP haba kren ha kane ka jingialang
Na ka liang jong ka sorkar Meghalaya, la sngewthuh ba ka la jied pat ia u wei na ki heh pulit u B Kezo u ba bat mynta ia ka kam kum u DG jong ka tnad ba deipeit ia ki phatok jong ka jylla Nagaland yn wan ban shimti ia kane ka kam DGP jong ka jylla Meghalaya.(SP News)
