Shillong Naitung 20: Ki paidbah nongshong shnong ka thain ka Syntein kaba hap hapoh Mawsynram Constituency mynta ka sngi kila dap da ka jingsngewdiaw haba ka jingpynkhreh ka jong ki ban wan ka kynhun sorkar ban jurip ia kane ka thain ha kaba ia dei bad ka kamthain kriah ha kaba ki heh jong ka Asian Development Bank (ADB) Ki ophisar jong ka tand kharkhana ka jylla bad na ka tand skill development kim shym la lah banpoi sha ka shnong Kenmensaw ka jaka ba la pynkhreh ban pynlong ia ka jingialang paidbah.
La iathuh ba katei ka kynhun kaba kynthup ia ki heh ka tnad Skill Development, ki ophisar ka tnad Industries, ki heh ka ADB bad kiwei kiwei kila mih na nongbah Shillong ban leit jurip iaka Kenmynsaw kawei na ki shnong jong ka thain Syntein na ka bynta ban khmih ia ki jaka ban bei tyngka ia ki project bapher bapher ban kyntiew ia katei ka thaiñ.
Haba ki paidbah kila dap da ka jingkmen ba kin wan ki heh sorkar kila pynkhreh iaka jaka ban pynlong jingialang ryngkat bad ka bam ka dih bad kila pep ruh ban leit sha la ki bri, hynrei kane ka jingpynkhreh ka jong ki baroh kala pulom noh haba kitei ki heh sorkar kila phah wan kylla noh ia ki nongshong shnong shapoh Mawkaphan da kaba ai daw ba kim lah ban iaid kjat khamtam haba kila poi slem sha katei ka jaka.
Na ka daw ba kim lah ban leit namar ba la poi slem bad na ka daw jong ka jingialang ka suin bneng ba la jur eh u slap la ong ba la khot ia ki briew ba kin wan kiew noh sha ka shnong Mawkaphan ban ia kren bad ki briew kiba trei ia kane ka kam thian kriah.
Shwa ba katei ka kynhun kan leit sha katei ka shnong la dep ban pyntip lypa ba kin hap iaid da ka kjat bad la bthah ruh ia ki ba kidei ban rah ia ki diengduh, ban phong da ki juti ban nym syntuid, ban rah shatri bad kiwei kiwei ki jingdonkam.
Haba iakren bad u nongthoh khubor ka Director ka tnad Skill Development ka kong RM Kurbah kala pynpaw ba ka daw ba kim lah ban leit sha katei ka shnong kadei namar ba kila poi 3:30 mynsngi hapoh Mawkaphan bad haba ki pyrshang ban hiar sha Kenmynsaw kila mad jingeh namar ka jingbtuid jong ki mawjingkieng kaba ki iaid.
Lah ban ong ruh ba lada kine ki heh sorkar ki hiar ha ka por 3:30 mynsngi kin poi ha ka shnong Kenmynsaw ha ka por 5 baje bad hadien bala dep pynlong iaka jingialang hapoh 1 kynta, lada ki mih na katei ka jaka ha ka por 6 baje kin hap ban kiew ia ki mawjingkieng bad kan shim por ia ki 2 kynta shiteng ban poi sha Mawkaphan bad kin poi ha ka por 8:30 mynmiet katta ruh lada ki biang ki torchlight naba ki hap iaid ha ka jingdum.
