Shillong, Jylliew 12: Ka Khasi Student’s Union Thyllaw Border Unit ka
pynpaw iaka jingsngew bynniaw bad ka jingsngewkhia kaba jur iaka
jingleh reiwkhlaw ki katto katne ki briew ki ba la nud ban pynap prek
ha ka surok PWD kaba na Lawbah sha Thyllaw kaba iaid lyngba ka shnong
Mawlongbna.
Kane ka jingleh riewkhlaw bad khaweit da ki katto katne ki briew ka
wanrah iaka jingiashun hapdeng ki para nongshong shnong ka thain baroh
kawei, bad ka buh hapdeng ka jingeh iaki paidbah ka shnong Thyllaw, ha
ka leit ka wan ka kit ka bah bad khamtam ia kiba pang ba shitom. Namar
ba kane ka jingpynap prek kala neh la kumba ar taiew eiei mynta kaba
la pynlong ba bun ki kali kamai ki hap ban sangeh shwa namar ba kim
long shuh ban iaid lyngba katei ka surok.
Halor kane ka jingjia na ka liang ki paidbah ka shnong Thyllaw kaba
kynthup ia lai tylli ki shnong ka Thyllaw, Nongrim Warding bad
Mawdiengkhied, kila leit ban ujor sha ki pulit ka Mawsynram PS ban
shimkhia lem ia kane ka jingeh kaba kum ki paidbah ki mad.
Na ka liang u President ka KSU Thyllaw, Bah Ebanjune Ramsiej ula kyntu
ia u Rangbah shnong ka Mawlongbna ba un shimkhia ia kane ka kam da
kaba un maham jur iaki paidbah nongshong shnong ka Mawlongbna ba kim
bit ban leh ia kum kine ki jaitkam namar ka ktah iaka iap ka im.
Shuh shuh na ka liang ka KSU Thyllaw kala pynpaw ba kum kine ki
jingjia kila jia teng mynshwa ha ka snem 1997 ha kaba ki nongshong
shnong ka Mawlongbna kila pynthut iaka leit ka wan ki nong Thyllaw da
kaba kileh ia kitei ki juh ki kam. Halor kane ka jingjia ki pulit ka
Mawsynram kat haduh kine ki sngi ki dang ailad iaki ban leh kat kaba
ki mon wat ban byrngem da ki ktien khlem akor, kane ka jingailad ki
pulit imat ka don eiei sha lyndet.
U Bah Ramsiej ula kynthoh ba kum kine ki jingjia ki mih dei na ka daw
ba ka Khasi Hills Autonomous District Council (KHADC) kam shym la lah
ban pynbeit ia u pud u sam jong ki artylli ki hima kata ka Hima Dwara
Nongtyrnem bad ka Hima Mawsynram, kaba la jia naduh mynshuwa.
Shuh shuh ka KSU kala pynpaw ba lada ym lah ban pynbeit mynta ia u pud
u sam kan poi ka por ba kin don ki jingia umsnam, kumba la paw mynta
ba ki briew na ka shnong Mawlongbna kila byrngem byrsit wat ban shim
iaka jingim jongki paidbah ka Hima Dwara Nongtyrnem lada ki ialeh
pyrshah iaki. “Kan myntoi aiu ban pynbeit ia u pud u sam ynda la jiaki
jingjia ba sngewsih, bad ngi kyntu ia u CEM ba un pynbeit noh mardor
ia kane ka kam, namar ka ktah jur iaki paidbah kiba leit trei leit
ktah man la ka sngi,” ong u Bah Ramsiej.
Na ka liang ka KSU ka maham jur iaki briew kiba shim kabu bad lada ka
seng ka lap kan pynshitom katkum ka ain.(SP News)
