Jowai, Jylliew 02: Ka KSU Myntriang Unit ka pynpaw ia ka jingsngewnguh ia u BDO ka Saipung block bad ruh ki briew sorkar kiba la wan sha ka shnong Myntriang ha ka 29/05/2014 ban pynshai halor ka skim NREGS (Skim 100 sngi) khamtam kita ki jingbthah jong ki ia ka Dorbar shnong ban pynbiang ia ki kot ki sla badonkam, hapoh 5 sngi, khnang ba yn lah ban pyllait ia ka skim na ka bynta ka surok Myntriang – Kyrluh.
Hynrei ka seng ka pynpaw pat ia ka jingsngewlyngngoh halor ka jingbym pyrta shnong, ban lum ban lang ia u paidbah nongshong shnong, kiba don JOBCARD sha kane ka jingialang bad u Rangbah shnong u la khot tang ia ki katto katne ki rangbah. Kane ka jingleh jong u Rangbah ka pynsngewsih ia kiba bun ki paitbah jong ka shnong.
‘Kum ban shu pynkynmaw, ka seng ha ryngkat ka Dorbar ka la buh por haduh bnai June ia u Ma Wolding Lamurong, Rangbah Shnong ba un siew ia ka pisa 5.14 Lak tyngka kaba u la bamklop na ka skim NREGS ha ki snem ba u bat kum u secretary VEC kaba u hi ruh u la kular ban siew.
Ka seng ka pynrem jur ki katto katne kiba khot ia ka seng ba ka dei ka nongpynklumar shnong tang namar ba ka lap ia ka jingshishaha ka jingbamklop ia ka skim paitbah lyngba ka RTI ba pan na ophis ka Saipung block’, la pynpaw u samla Iamon Lapasam, President KSU Myntriang Unit.
Une u President Ka KSU Myntriang Unit, Samla Iamon Lapasam u la ban shuh shuh ba Ka Seng, kan ym kli kti ne kynran dien ha ka ban iaid shaphrang ban pynioh iaka hok u Paitbah wat la ki don ki khwan myntoi ki pyrshang ban pynwit lynti namar ka Seng kan trei ka kum ka riti synshar jong ka hi.(SP News)
