Shillong, Iaiong 08:Ka Confederation of Ri Bhoi People (CORP) Central Body ka pynpaw ia ka jingsngewkhia jur halor jingjulor ka mariang na ka jingpom dieng pom siej pathar ki briew kaba long ka jingma ia ka lawei jong ri bad ka jaidbynriew.
Ka jingpom dieng pom siej pathar ka jur bha ha ka thain Ri Bhoi Sepngi bad dangshen ka seng ka la lap ia kane ha Lailad, Tasku bad Jirang ban pyniaid iew shabar Jylla kaba la pynsynlen ia ki khlaw ki btap tang na bynta ban myntoi shimet.
“Ym tang ka pom dieng pom siej, kawei pat ka jingma kaba kham sniew shuh shuh ka long ka jingklong maw bad klong shyiap na ki wah kaba lah ban pynrngad ia ki wah duid ne ki tyllong um bad pyniap ruh ia ki dohkha dohpnat. Ka wah Umtrew ka la kylla thwei ha bun ki jaka namar ka jingklong shyiap bad ha Jirang bun ki lum ki la kylla madan namar ka jingklong maw shilynter u pud bad ka Assam,” la pynpaw ka kyrwoh.
Halor kane, ka CORP pynpaw ia ka jingsngewkhia kaba jur ka tnad treikam jong ka Sorkar Jylla kaba peit ia ki khlaw ki btap khamtam ka District Council kaba ju kam ban pynneh ia ka khyndew ka shyiap bad ki khlaw ki btap pynban ki leh matlah ia katei ka jingpynjulor ka mariang bad ka khyndew ka shyiap.
Katkum ka hukum kaba la pynmih da ka Iingbishar ba don burom, ka Supremt Court ha ka 12 Tarik Jylliew, 1996. Ka la mana ba ym bit shuh ban pom dieng namar ka jingjulor ka mariang ka la long shaba palat bad lada ki pom ruh ki dei ban pom tang ki dieng kiba la heh bad pyntip sha ka tnad khlaw na bynta ban thung bujli da kiwei ha jaka ba la pom, hynrei kumba long mynta kane kam shym la treikam ha ka Jylla ne ka District Council.
Kumjuh ka sorkar India ka la pynkup bor ia ka District Council katkum ka Constitution lyngba ka 6th Scheduled ban peit ia ki khlaw ki btap bad ki um ki wah hynrei na ka liang ka District Council ruh ka leh bym patiaw wat lada ka iohi ba ka jingjulor ka la ktah ia ka mariang namar ka tieng ioh ka duh noh ia ka khajana. Kane ka long katkum ka khubor ba la pyllait da u Bah G.S Hat Publicity Secretary ka CORP sengkmie.(SP News)
