Shillong, Jymmang 01: Ka seng Meghalaya Mines Owners and Exporters Association ( MMOEA) ka sngew ba kin nym lah ban kit lut ia u dewiong u ba la dep ban tih namar ka jingsniew palat pud jong ka surok na Nongjri sha Borsora land custom station, na Lailad sha Borsora bad na Nongjri sha Bakli Land Custom Station, ki exportes kin nym lah ban kit lut ia u dewiong shuwa ka 30 tarik mynta u bnai kumba la buh por da ka iing bishar ba ha khliehduh jong ka Ri India, ka Supreme Court.
Na ka liang jong ka MMOEA ka buh ia kane ka jingkyrpad sha ki bor ba halor ba kin sngewbha ban pynjlan shuh ia ka por kaba la buh, khamtam ia ka South West Khasi Hills District namar ka jingsniew palat jong ka surok ha kaba kim lah ban iaid ki kali ha ka rukom kaba dei.Ka jingkylla kali ha kitei ki surok ka long man ka sngi.
U President jong ka seng MMOEA, u Bah Julius C Diengngan, u la ong ba ka jingsniew jong kitei ki lai tylli ki surok ki ban leit sha ki LCS ban shallan ia u dewiong sha Bangladesh ka long kaba la palat pud dei na kane ka daw ba ki exporter ki don ha ka jingsyier mynta ba kin nym lah ban pynlut ia u dewiong shuwa ka por ba la buh da ka iing bishar ba don burom ka Supreme Court. Na ka liang jong ka MMOEA ka kyrpad ia ki bor ba dei peit ba kin pynjlan shuh ia ka por.
Ha ka juh ka por na ka liang jong u Bah Diengngan, u kyntu ia u MLA jong kane ka jaka u Martin M Danggo u ba dei ruh u myntri ba dei peit ia ka kam shna surok ha ka jylla ba un shim khia kypang ban maramot ia kine ki surok khnang ba ki kali kin lah ban iaid ha ka rukom kaba dei ban ioh ban pynlut ia u dewiong ha ka por ba la buh.
