Shillong, Iaiong 13: Tang mynta u snem 2017 ki shipai BSF kila ioh ban kurup haduh 3000 tylli ki masi kiba la thmu ban phah sha Bangladesh, kane kala buh ia ki BSF ha ka jingeh ha kaba kim ban se ban pynjur ia ka jingpahara ha khappud bad ban wad ia ki lad ki buid thymmai ba kem ia ki nongkhaii masi beain sha Bangladesh.
Ki shipai BSF kiba don ha khappud bad ka Bangladesh kila ioh ban kem ia u Namdy Limphu 32 snem ka rta na Baghmara ha dien ba kila suba ia ka rukom iaid rukom ieng jong u ha khappud bad ka Bangladesh bad ha dien ba la kem ia u la shem ba u dei u nongkhaii masi beain sha Bangladesh ia u ba ki BSF kila kem ia u ha u snem 2015 u ba dei na ka shnong Chiringiri jong ka South Garo Hills District.
Namar bala jyllei palat kane ka jingiakhaii masi na India sha Bangladesh, na ka liang jong ki BSF kila pyndon kam ia ki buid thymmai kumno ban ioh kem ia kine ki nongkhaii masi tuh sha Bangladesh. Kiba khaii masi kiba bun dei kiba im ha khappud bad ka Bangladesh namar ba kine ki tip ia ki lynti syngkieng ban rung ban mih sha Bangladesh.
Wat la ki BSF ki kem na ka por sha ka por kane ka jingiakhaii ka la dang jyllei namar kiba leh ia kane ka kam kim don kam ban bei pisa hynrei ka jingiohnong ka bun. Tang mynta u snem ka jingioh kem ia ki masi na khappud jong ka jylla Meghalaya ka la kot sha ka 3000 tylli ki masi.
