Shillong, Iaiong 05: Ka seng BJP ka ong ba ka jingkynnoh jong ka ki nongialam ka seng Congress pyrshah ia ka BJP kum ka party ba long pyrshah niam ka long kaba khlem nongrim bad ka long kaba um lah ban pdiang.
Na ka liang jong ka BJP kala ong ba ka Congress ka dei ban pyrkhat bha ha ba ka leh ia ki kam kiba ia dei bad ki kam pyrshah niam ne jaid bynriew ha ka politic bad kane ka paw na ka jingleit ia kynduh jong ka nongialam ka seng Congress ka Sonia Gandhi ha ka jaka ba kynjah ia Shahi Imam of Jama Masjid Syed Ahmed Bukhari.
Ka BJP kala ther kylla ba dei kane ka seng Congress kalaba la pynwan dur ia ka ain pyrshah kylla niam ia kaba la tip kum ka “anti-conversion laws in the country” dei ka sorkar Congress kaba la leh ia kane ha ka jylla Odhisha, katba ha Madhya Pradesh bad Arunachal Pradesh kila pass ia ka ain “Freedom of Religion Act, 1978” kine ki ain ki long ban khang ia ki briew ban kylla na kawei ka niam sha kawei pat.
Lada ka long kumba la kynnoh da ka seng Congress ba ka BJP ka long pyrshah niam kumno ki paidbah kum ha ka jylla GOa bad Nagaland ki jylla ba bun ki Khristan ki jied ia ka seng BJP la kylli kylla ka BJP.
Lada ki briew jogn ka jylla Meghalaya, kila jied ia ki briew jong ka BJP kum u ban TH Rangad u ba la bam kwai ha dwar u blei bad kiwei. Ki sngew lyngngoh ban iohi ba kum u bah AL Hek haba u la jop nyngkong na ka BJP mynta u kylla ktien da kumwei pat.
Kumba ka long mynta ka BJP ka sngewkhia jur ia ka jingwan tuid jong ki briew na Bangladesh sha kane ka jylla bad lada ka BJP ka wan ha ka bor kan wanrah ia ki ain kiba khlain ban iada na kane ka jingwan rung kyrthep ka jong ki namar ka long ka jingma ia kane ka jylla bad ka thain baroh kawei.
Ki nongialam jong ka BJP kila dei ban ia kren ba dki nongialam jong ka seng BJP na kane ka dong shatei lam mih ngi ha kaba ia dei bad kane ka kam ryngkat bad ka kynhun North East Regional Party Forum.
Ka seng BJP ka sengew khia jur ia ka jingkyrduh kam kyrduh jan bad ka jignsah dien kane ka thain, ka BJP kan sa leh ei ei ynda kala wan ha ka bor ha Delhi ha kaba ia dei bad ka jingkynnoh pyndam sailih kaba la ktah ia ki samla pule.
Ka thong jong ka seng BJP ban leh ynda ka wan ha ka bor ka long ban pynkylla ha ka rep ka riang na ka bynta ban kyntiew ia ka ioh ka kot bad kumno ban pyniaid iew ia ki marrep.(SP News)
