Shillong, Naitung 10: Ka seng Movement for Indigenous Peoples Rights and Livelihood- Meghalaya(MFIPRALM) mynta ka sngi kala phah da ka dorkhas sha u myntri rangbah ka jylla u Dr Mukul Sangma ha kaba kane ka seng kala kynnoh ba ka National Green Tribunal (NGT) kam don ka jingsngewthuh ia ka jingdon jong ki District Council ha kane ka jylla.
Ha kane ka Dorkhas ka tei ka seng kala ong ba kane ka jingkhang tih dewiong kala ktah ia ka ioh ka kot jong ki paidbah kane ka jylla bad kumba ka long mynta ki briew kiba trei ha kane ka kam ki don palat ia ka 1.5 lak tylli ki long iing ha kane ka jylla. Kane ka jingkhang kynsan kala ktah ia ka ioh ka kot jong ki briew.
Kumba ka paw ba ka jingkhang ia kane ka kam tih dewiong ha kane ka jylla Meghalaya ka dei tang na ka daw ba ka seng samla pule All Dimasa Students’ Union and Dima Hasao Dist. Kala mudui sha iing bishar, khlem da leh ia ka jingjurip kaba bniah la shu khang dam syndon ia kane ka kam tih dewiong ha ka jylla.
Ha kane ka dorkhas kaba kila phah la suh lang ruh ia ka jingthoh kaba la phah da ka sorkar pdeng ha u snem 1987 sha u myntri rangbah ba rim ka jylla u Captian W A Sangma bam kwai ha dwar u blei ha kaba la thoh shai kdar ba ka sorkar pdeng kam don kano kano ka jingthmu ban pynthud ia kane ka kam tih dewiong.
Katei ka seng kala ong ba kumba ka long mynta wat ka Meghalaya Polution Control Board ruh kam sngewthuh ia kaei kaba ka leh, na ka liang jong ka seng ka kyrpand ia u myntri rangbah ban leh ei ei noh ban pynlait ban kit ia u dewiong ba la dep ban tih. Ia kane ka dorkhas la soi da u bah Herald S Dkhar kum u Chairman bah K C Rymbai kum u Genenral Secretary bad kiwei kiwei ki dkhot jong ka seng.(SP News)
