Shillong, Jylliew 05: U Bah O M Shylla general secretary jong ka seng Hynniewtrep Achick National Movement (HANM) u la ong ba katkum ka jinglap ka jong u na ka RTI kaba u la pan na ka Mawbidong Presbyterian Upper Primary School, la lap ba ha kane ka skul ki don saw ngut ki nonghikai bad u wei na kita u dei u ba dang shu pass matrik.
Kine ki nonghikai, u Bah Aiborsing Syiemlieh u dei u ba la pass BA, u Bah Passing K Syiemiong u dei u ba la pass ia ka Class X, u Bah Shelmanroy Shangdiar bad u bah Shanboklin Nongsiej ki dei kiba la pass ia ka Class XII. U bah Shylla u la ong ba kane ka long pyrshah ia ki rule thungkam jong ka sorkar katkum ka RTE Act hynrei balei ka sorkar ka leh matlah ia kane.
Katba ha kane ka juh ka shnong Mawbidong ia ka Lower Primary School kaba la pyniaid da ka balang Presbyterian ki nonghikai ki don lain gut, Plaspingroy Shangdiar u ba bat ruh ia ka kam secretary u la pass ia ka BA, u Bah Habanjopjune Shangdiar MA bad ka kong Batriti Marwein Class XII.
Kane ka jingpan RTI kam kut tang na ka skul, hynrei u la pan ruh ia ka RTI na ka ophis jong u DMC jong ka South West Khasi Hills District bad ia kane ka kam kila leit ban ujor sha duh ka myntri jong ka tnad pule puthi jong ka sorkar jylla ka Debora Marak hynrei ka sorkar kam shym la leh ei ei haduh kine ki sngi.
