Shillong, Jymmang 12: Mynta ka sngi ki paidbah nongshong shnong ka thain Nongjri bad ki khynnah skul jong katei ka dong ki la ia mih paidbah ban ia shim bynta ha ka jingiaid paidbah ban pynpaw pyrshah ia ki kam rah bor bad jingdawa pisa jubor da ki briew kiba ym lah ban tip.
Ka seng KSU kala khot ia kane ka jingiaid paidbah kaba la sdang na Nonghylla bad pynkut sha Nongjri ka jingiaid kaba jngai kumba saw kilo metter ei ei bad ka jingthmu jong kane ka jingiaid paidbah ka long ban dawa ba ka jingrah bor bad ka jingdawa pisa jubor ha katei ka thain ka dei ban kut noh.
Na ka liang jong ka KSU South West KHasi Hills District kaba la khot ia kane ka jingiaid paidbah mynta ka sngi ha katei ka thain ha ka banar jong ka kala thoh shai kdar Ka jingialang paidbah ban dawa pynkut noh, ia ki kam rabor, thombor bad dawa pisa jubor na ki paidbah hapoh u pud u sam jong ka South West KHasi Hills District.
Ha ki placard kiba la thoh bad rah da ki khynnah skul kila thoh shai kdar ba ki nongrahbor ki dei ban pynlait noh ia u Dajied u ba la shah rah bor, ki don ruh ki jingthoh kiba la thoh ba ki paidbah ki kwah ia ka jingsuk.
Ha kane ka sngi na ka liang jong ki pulit ruh kila ia don lang ban synran ia ki paidbah ban peit ba kane ka jingiaid paidbah kan long kaba iaid beit khlem da don kano kano ka jingjia kaba sngewsih. Ka jingiaid paidbah kala sdang na Nonghylla bad la pynkut da ka jingialang paidbah ha Nongjri ha kaba bun na ki kren ki kwah ban ka jingsuk kan don ha katei ka dong bad ka thain bad kine ki kam rahbor bad dawa pisa jubor ka dei ban kut noh.
