Shillong, Nailur 29: u Myntri rangbah ka jylla u Dr Mukul Sangma mynta ka sngi u la leit ban iouh kjat ia ka Iewduh kum u myntri rangbah ha ka sien kaba nyngkong bad ha kane ka jingleit u la turwa bun ki jingiarap kiba ka sorkar ka lah ban leh ban pynbha ia ka iewduh bad mynta ka shong ha ka Hima Myllim ban ai ia ka jingiatreilang.
Haka jingkren jong u Dr mukul, u la ong ba ka kam jong ka sorkar ka long ban peit ia kiei ki jingeh bad kumno ban ialeh ia kita ki jingeh ka hap ban pynbeit. Haba ia dei bad ka Iewduh na ka liang jong u myntri rangbah la tyrwa ba ka sorkar ka long kaba la kloi ban ia trei lang bad ka hima bad ka shong sa ha ka hima ban ia shong pyrkhat bad ka sorkar kumno ban leh.
Haba ia dei bad ka pisa u myntri rangbah u la ong ba ynda ka sorkar bad ka hima kin ia shong ban pyrkhat kam, kin sa ia peit na kiei ki lad kilynti kumno ban pynmih ia ka pisa, dei na kane ka daw “ Nga la wan ialam ia shibun ki heh sorkar mynta ka sngi ban ia peit lang”.
U myntri rangbah u kwah ban iohi ba kane ka iewduh ka dei ban long ka iew kaba khuid ha kaba ki briew kiba wan na sha bar kin sngewtynnad ban wan sha kane ka iew, ka long ka burom ba dei tang kane ka iew ha kaba la pyniaid da ka hima mylliem, ka sorkar kan ai ka jingkyrshan ia ka hima ban weng ia ki jingeh.
Ha kane ka sngi u myntri rangbah u la pynbna ba ka sorkar kan sab uh kyrpang ia ka pisa na ka bynta ka iewduh bad kane kan iaid lyngba ka ophis jong u Deputy Commissioner jong ka East khasi Hills bad kane ka pisa kan long na ka bynta ban pynbha ia ka iew.
Haba ia dei bad ka jaboh jabain kaba mih na kane ka iew u myntri rangbah u la ong ba u la ia kren bad u myntri rangbah ka jylla Assam ban ia treilang ba na kane ka jaboh kaba mih na Meghalaya bad na ka sorkar Guwahati ban lum lang ban pynmih ia ka bor ding eletrik. Ka jingkylli mynta kam dei shuh ka jaka bret niut hynrei ka jingkylli ba kumno ban pyndap da ki niut ban pynmih bor ding.
Kiwei kiba la kren ki long ka kong Roshan Warjri myntri ka koit ka khiah, u Bah Rooni V Lyngdoh myntri kam pynroi sor, na ka liang jong ka hima la kren da u Syiem jong ka hima mylliem u Pa’im Ricky Nelson Syiem ha kaba u la ong b aka hima ka kwah ban ia treilang bad ka sorkar ban pynbha ia kane ka iew.
Ha kane ka sngi ki heh sorkar kiba la ia don lang ki long u Additional Chief Secretary u PW Ingty, ka Principal Secretary ka kong RV Suchiang bad bun ki heh sorkar na kit and bapher bapher ha kaba ki nongshong iew ruh daki hajar ngut kila wan ban sakhi ia kane ka jingialang kaba la long ha iew die jhur lang.
