Shillong, Nohprah 27: U Secretary jong ka North Eastern Council (NEC) u Ram Muivah u la ong ba ka North Eastern Council kala buh ia ka jingtyrwa ba ia ka jingbha pisa na ka bynta ki jylla ka dang shatei lam mih ngi dei ban leh noh katkum ka jinglong jingman jong ka jylla ban lait na ka jingshah kynnoh b aka don ka jingmang pisa kaba leh shiliang khmat.
Haba kren ha ki lapathai khubor ha kamra trei kam ka jong u mynta ka sngi u la ong ba ia kane ka jingtyrwa jong ka NEC yn sab uh ha khmat ka jingialang jong ka governing body , ha kaba baroh ki Lat bad ki myntri rangbah jong ki jylla ka dong shatei lam mih ngi jong ka Ri India ki long ki dkhot jong kane ka council, lada pdiang kane kan trei kam noh naduh u snem mang tyngka 2017-2018.
Katkum kane ka jingtyrwa ka jingmang pisa kan long katkum ka jinglong jong ka jaka kata ka jylla, ka jingdon ki paidbah nongshong shnong bad ka jingkiew ha ka ioh ka kot jong ki briew. Katkum kane ka jingtyrwa ka jylla Assam kan ioh 25%, ka Jylla Arunachal Pradesh kan ioh 13%, katba ka jylla, Meghalaya, Tripura, Mizoram, Nagaland bad Manipur kin ia ioh mar 11% katba ka jylla Sikkim kaba la kham kiew ban ia kiwei ki jylla ka dong shatei lam mih ngi kan ioh tang 7%.
Haba ia dei bad une u snem mang tyngka 2016-2017 ka NEC kala mang beit T.100 klur ia baroh ki jylla da kaba pyniapher hangne hangtai hynrei kam da ia pher bun bad ka jylla Meghalaya mynta u snem kala ioh T.120 klur.
Haba jubab ia ki jingkylli n aka liang jong u Muivah, u la ong ba ka NEC man u snem ka ioh ia ki skhim na ki sorkar jylla baroh kan nym duna ia ka T.4000 klur hynrei ka jingmang pisa pat ka long tang T.920 klur mynta u snem bad na ka bynta jong u snem ban wan la mang tang T.925 klur.
U Muivah, u la ong ba ka “NEC ka long kum ka khunlung namar bay m don ba kren lem na ka bynta jong ka” hynrei ka NEC ka dei ka ophis kaba la seng ia ka katkum ka Riti synshar jong ka Ri bad ka sorkar pdeng kala mang ia ka pisa na ka bynta ban pyntrei ia ki kam pynroi ha kane ka thain shatei lam mih ngi jong ka Ri India.
Ha kane ka sngi u Secretary u la pynlait ruh ia ka calendar jong ka NEC kaba dei na ka bynta jong u snem 2017, ha ka jingiadon lang bun ki ophisar jong kane NEC hapoh jong ka NEC Auditorium.
