Shillong, Lber 27: U Bah Alvin K Sawkmie MDC jong ka Mawsynram mynta ka sngi u la shah jied kum u Deputy Chairman jong ka KHADC khlem da don ba ia leh pyrshah.
Haba kren kum u Deputy Chairman hapoh ka iing dorbar na ka liang jong u Bah Alvin, u la ong ba da ka jingshimti ia kane ka shuki Deputy Chairman u hap ban loit noh ia ka uniphom jong ka party.
Ha kane ka sngi u la ai ka jingkular ha ka iing dorbar ba yn nym ia shahliang hynrei yn pyniaid ia ka iing dorbar katkum ka AD Rule jong ka iing dorbar. Ha ka juh ka por u la ong ba kum ki MDC kiba dang thymmai ki don kam ia ka jingbtin lynti jong kiba la rangbah.
Ha ka jingkren ai khublei na ka liang jong u nongalam ka liang pyrshah u Bah Lamphrang Blah u la ong ba ong haba shong ha ka shuki kum u Deputy Chairman u dei ban loit noh ia ka uniphom jong ka party bad ha kaba pyniaid ia ka iing dporbar ymd ei ban leh shiliang.
Ha ka jingkren ai khublei na ka liang jong u CEM u Bah Teinwell Dkhar u la ong ba wat la da dang khynnah hynrei haba shong ha ka shuki kam dei ban noh shiliang haba pyniaid ia ka dorbar kum u briew ba la shemphang bad ban pyniaid ia ka kam kumba la shem phang.
Ha ka juh ka por u la ong ba ka shuki ba shong kum u Deputy Chairman ym dei ban don ia kata ka jingsngew hynrei u dei ban shong ha ka shuki da ka jingpyrkhat namar ia kaei kaba jia hapoh iing dorbar ka phlang sha bar.
Ha ka jingkren ai khublei na ka liang jong u Lamphang ka iing dorbar u Bah Pynshngianglang Syiem u la ong ba ym don hok ban leh shilliang haba pyniaid ia ka iing dorbar, hynrei u la ong ba na ka liang jong ki dkhot ka iing dorbar ruh kim dei ban pyni ia ka jingsngew jong ki.
Ha kane ka sngi jan baroh ki dkhot jong ka iing dorbar la ki dei na ka liang pyrshah ne ka liang synshar kila ia kren ai khublei ia kane ka jingjop kaba khlem da don ba ia khun pyrshah ia kane ka shuki Deputy Chairman bad ki dkhot ka iing dorbar kila pynsngew ba ymd ei ban leh shiliang.
